काठमाडौं, ७ फागुन । नेकपा एमाले र नेकपा माओवादी केन्द्रबीचमा पार्टी एकीकरण गर्नेबारे प्रारम्भिक आधारहरुमा सहमति भएको छ ।

सोमबार राति ११ बजे सकिएको पार्टी एकता संयोजन समिति बैठकले एकीकरणका आधारहरु तय गरी दुवै पार्टीका नेताहरुले हस्ताक्षर गरेका छन् ।

एकीकृत पार्टीको नाम नेपाल कम्युनिष्ट पार्टी रहने सहमति पत्रमा उल्लेख छ । पार्टीको निर्देशक सिद्धान्तमा माक्र्सवाद लेनिनवाद रहने छ ।

त्यसैगरी, नेकपा एमालेले अपनाउँदै आएको जनताको बहुदलीय जनवाद अन्तर्गत अबलम्बन गरेको शान्तिपूर्ण बहुदलीय प्रतिस्पर्धा मार्फत आफ्नो श्रेष्ठता स्थापित गर्ने लगायतका मान्यता र शान्ति सम्झौता र त्यसपछिका लोकतान्त्रिक अभ्यासद्वारा नेकपा माओवादी केन्द्रको पनि उक्त शान्तिपूर्ण बहुदलीय प्रतिस्पर्धा मार्फत आफ्नो श्रेष्ठता स्थापित गर्ने लगायतका मान्यतामा समान धारणा रहेको कुरा स्पष्ट भएको सहमतिमा उल्लेख छ ।

त्यस्तै नेकपा एमालेले अबलम्बन गरिआको जनताको बहुदलीय जनवाद र नेकपा माओवादी केन्द्रले अवलम्बन गरि आएको माओवाद र एक्काइसौं शताब्दीमा जनवाद सम्बन्धी विषयहरुमा विधिसम्मत छलफल गरी आवश्यक परिमार्जन र विकास गर्न सकिने सहमति गरेका छन् ।

यी सबै आधारमा टेकेर अन्तरिम राजनीतिक प्रतिवेदन एवं अन्तरिम विधान तयार गरी सोही अनुसार एकीकृत पार्टी सञ्चालन गर्ने सहमति भएको छ ।

प्राप्त उपलव्धीको रक्षा र विकास गर्दै राष्टियता, लोकतन्त्र र सामाजिक न्याय सुदृढ गर्दै सामाजिक आर्थिक रुपान्तरणमार्फत समाजवादका आधार निर्माण गर्ने जनाएको छ ।

आगामी महाधिवेसनलाई एकता महाधिवेसनका रुपमा समझदारीका साथ भव्य रुपमा सम्पन्न गर्ने पनि सहमति भएको छ ।

सहमतिपत्रमा नेकपा एमालेका तर्फबाट अध्यक्ष तथा प्रधानमन्त्री केपी शर्मा ओली, झलनाथ खनाल, माधवकुमार नेपाल, बामदेव गौतम र इश्वर पोखरेलले हस्ताक्षर गर्नुभएको छ । त्यसैगरी, माओवादी केन्द्रको तर्फबाट अध्यक्ष पुष्पकमल दाहाल प्रचण्ड, नारायणकाजी श्रेष्ठ र रामबहादुर थापाले हस्ताक्षर गर्नुभएको छ ।