प्रधानमन्त्री पुष्पकमल दाहाल प्रचण्डले कान्तिपुर मिडिया ग्रुपका अध्यक्ष कैलाश सिरोहियाप्रति सरकारको कुनै रिसइबी नभएको र उनी अदालती प्रक्रियाबाटै पक्राउ परेको स्पष्टीकरण दिएका छन्।

‘हिमाल, मानिस र जलवायुसम्बन्धी विज्ञहरूको अन्तर्राष्ट्रिय संवाद’ कार्यक्रमपछि पत्रकारहरूलाई चन्द्रागिरीमा संक्षिप्त प्रतिक्रिया दिँदै उनले अदालती प्रक्रियाबाटै सिरोहियाविरुद्ध छानबिन अगाडि बढेको बताएका हुन्।

‘अदालतले प्रक्रिया अगाडि बढाऊ भनेपछि अदालती प्रक्रिया बुझ्याछु मैले। यो बढ्ता होहल्ला गर्न जरुरी लाग्दैन मलाई’, उनले भने।

सरकारले रिसइबी साँध्यो भनिएको छ नि भन्ने प्रश्नमा प्रधानमन्त्री प्रचण्डले भने, ‘त्यो गलत कुरा हो। उहाँसँग केको रिसइबी?’

गृहमन्त्री व्यक्तिगत रूपमै उत्रिनुभयो भन्ने छ नि भन्ने अर्को प्रश्नमा उनले भने, ‘त्यो मान्छेले भन्ने कुरा मात्रै हो। अदालती प्रक्रियाबाट उहाँ निर्दोष हुनुहुन्छ। सजिलै छुट्नुहुन्छ। यो हल नै भइहाल्छ।’