सप्तरी, १७ फागुन । राजविराजस्थित गजेन्द्रनारायण सिंह सगरमाथा अञ्चल अस्पतालमा चिकित्सकको लापरबाहीका कारण एक गर्भवती महिलाको मृत्यु भएको भन्दै आफन्तजनले प्रदर्शन गरेका छन् ।

सोमबार अस्पतालमा प्रसुती गराउन भर्ना भएकी सप्तरीको विष्णुपुर गाउँपालिका १ निवासी अनिता यादवको बुधबार राती प्रसुती गराउने क्रममा मृत्यु भएको अस्पतालले जनाएको छ ।

बुधबार राती ८ बजेदेखि पीडा सुरु भएपछि सुरुदेखी नै उनको उपचारमा लागेका अस्पतालका चिकित्सक दिलिपकुमार साह नआएपछि राती १ बजे अनिताको मृत्यु भएको उनका श्रीमान रमेश यादवको आरोप छ ।

यता समयमै उपचार नपाउँदा मृत्यु भएको भन्दै आफन्तले बिहानैबाट अस्पताल परिसरमा नाराबाजी र प्रदर्शन गरेका छन् । प्रदर्शनकारीले चिकित्सक साहलाई तत्काल कारबाहीको माग गरेका छन् । मृतक अनिताको ३ बर्षका छोरा र एक बर्षिया छोरी छन् । गर्भवति भएसँगै अनिताले चिकित्सक साहसँग दैनिकी चेकजाँच गराउदै आएकी थिइन् ।

यसैबीच सप्तरीका निमित्त प्रमुख जिल्ला अधिकारी हेमबहादुर खड्का, प्रहरी प्रमुख मुकेश कुमार सिंह, राजविराजका नगर प्रमुख शम्भु प्रसाद यादव, उपप्रमुख साधना झा, जिल्लास्तरिय नेता, आफन्तजन, चिकित्सक लगायतबीच घटना सम्बन्धी र त्यसबाट उब्जेको परिस्थिति बारे छलफल भइरहेको छ ।