काठमाडौं १० असोज । नेकपा एमालेका उपाध्यक्ष सुरेन्द्र पाण्डेले नेपालले चीन र भारतबाट फाइदा लिनसके मुलुक विकास गर्न समय नलाग्ने बताएका छन्।

उनले भारत विश्वकै तेस्रो र चीन पहिलो ठूलो अर्थतन्त्र भएको मुलुक बन्दै गएको समरण गर्दै यसको फाइदा नेपालले लिन सक्नुपर्ने उल्लेख गरेका हुन्।

दुई छिमेकी देशहरु ठूलो अर्थतन्त्र भएको मुलुक बन्दैगर्दा नेपालले त्यसको फाइदा लिनुपर्ने र दुई देशबाट फाइदा लिनसक्ने क्षमता नेपालीहरूमा हुनुपर्ने जिकिर गरे।

‘भारत अब तेस्रो ठूलो अर्थतन्त्र हुने देश हुन्छ अब। यो ग्यारेन्टी नै छ। केही समयमा चीन पहिलो र भारत तेस्रो ठूलो अर्थतन्त्र भएको देश हुने स्थिति छ। यो दुवै हाम्रो लागि ठूलो अवसर हो। यसलाई प्रयोग गर्ने क्षमता नेपालीहरूमा हुनुपर्छ,’ पाण्डेले भने, ‘म कम्युनिस्ट विचारधाराको मान्छे। सरकारमा पुगेर काम गरेपछि म यो सरकार कम राखेमा हुने रहेछ, कर्मचारी कम राख्दा हुने रहेछ भन्नेमा पुगेँ। काम गर्नै दिँदैन, कम गर्न नै तयार हुँदैन।’

उनले क्यापिटलिजम र सोसलिजमलाई व्यवस्थित गरेर मात्रै देश समृद्ध बनाउन सकिने पनि उल्लेख गरे। नेपालले चीन र भारतलाई मात्रै पनि राम्रोसँग समात्नसके विकसित मुलुकमा नेपाललाई लैजानका लागि समय नलाग्ने उनको विश्वास छ।

‘क्यापिटलिजम र सोसलिजमलाई म्यानेज गरेर मात्रै युरोप र चीनले देश बनाएका छन्। यो चिजलाई नेपालका खासगरी हाम्रो ब्युरोकेसी र पोलिटक्सले कमाण्ड गर्न सक्नुपर्छ। निजी क्षेत्रलाई कहिले कहीँ गाली गर्ने, यी व्यापारी हुन्, नाफा खान्छन्, यो त्यो गर्छन् भन्ने आरोप आउँछ,’ उनले भने, ‘नेता पनि त्यस्तै हुन् गाली खान्छन्। कहिले कहीँ मलाई व्यापारी र नेता एउटै हुन् की जस्तो लाग्छ, दुवैले गाली खान्छन्। गाली खाएँ भनेर छोड्नु हुँदैन। तपाईंहरू अघि बढ्नुस् देश बन्छ।’