काठमाडौँ ४ कात्तिक । सहकारी ठगी प्रकरणमा अनुसन्धानका लागि प्रहरी हिरासतमा रहेका राष्ट्रिय स्वतन्त्र पार्टी का सभापति रवि लामिछानेले एमाले अध्यक्ष तथा प्रधानमन्त्री केपी ओली विरुद्ध आगो ओकलेका छन् ।
६५ करोड बढी गोरखा मिडियामा ल्याएर अपचनल गरेको आरोपमा प्रहरी हिरासतमा रहेका उनले केपी ओलीको सरकार रहिरहने हो भने यो देशले धेरै दुःख पाउने बताएका छन् । आइतबार कास्की जिल्ला अदालतमा प्रहरीले उपस्थित गराउँदा सञ्चारकर्मीलाई प्रतिक्रिया दिँदै उनले सरकारको रवैयाविरुद्ध आम जनता बाहिर निस्कनुपर्ने बेला आउनसक्ने बताए । ‘अधिनायकवादी सरकारको विरुद्ध यही बेलामा देशैभरीबाट जोजो जहाँजहाँ हुनुहुन्छ, मेरा लागि होइन देशका लागि बाहिर निस्कनुपर्ने बेला आउन सक्छ’, उनले भने, ‘म सबैलाई अपिल गर्न चाहन्छु– सम्पूर्ण न्यायप्रेमी दाजुदभाइ दिदीबहिनीहरू यो सरकार रहुन्जेलसम्म उसले यस्तै हर्कत गरिरहन्छ । झुटा मुद्दामा मान्छेलाई फसाउने काम निरन्तर चलिरहन्छ ।’

पोखरामा लामिछाने समर्थक र प्रहरीबीच झपड

लामिछाने शुक्रबार राजधानीबाट पक्राउ परेका थिए । उनलाई सूर्यदर्शन सहकारी ठगीसम्बन्धी उजुरीमा अनुसन्धानका लागि सीआईबीले जिल्ला प्रहरी कार्यालय कास्कीसमक्ष जिम्मा लगाएको थियो ।
उनी प्रहरी हिरासतमा गार्डको क्वाटरमा एक्लै वसेका छन् भने उनका पार्टनर पूर्व डिआइजी छविलाल जोशी गत एक महिनादेखि सोही मुद्धामा प्रहरी हिरासतमा रहेका छन् ।
लामिछानेलाई म्याद थप्न लैजांदा उनका कार्यकर्ता र प्रहरीबीच झडप भएको छ । प्रहरीको छानविनलाई सघाउने बताउँदै आएका लामिछानेले आफ्नो गिरफ्तारीको विरोधमा देशभरका आफ्ना समर्थकलाई सडकमा उत्रन अह्राएर कानुनलाई हात लिने बाटो अपनाएको भन्दै सामाजिक सञ्जालमा लामिछानेको चर्को आलोचना भइरहेको छ ।