काठमाडौं ८ कात्तिक । नेकपा एमालेको नीति अध्ययन तथा अनुसन्धान प्रतिष्ठानले नेपाली समाजका विविध आयामबारे अध्ययन गरी ८ वटा कार्यपत्र तयार पारेको छ।

बिहीबार विभिन्न चाडपर्वका अवसरमा शुभकामना आदानप्रदान तथा कार्य प्रगति विवरणबारे जानकारी दिन आयोजित कार्यक्रममा यो जानकारी दिइएको हो।

बदिलँदो भूराजनीति र समाजवादको यात्रामा पारेको चुनौती, बसाइँसराइले नेपाली समाजमा ल्याएको संरचनागत परिवर्तन, जनसांख्यिक संरचना र यसले नेपाली समाजवाद निर्माणमा पार्न सक्ने प्रभाव, संघीयता र सुशासनजस्ता विषयमा ८ वटा कार्यपत्र तयार पारेको कार्यकारी प्रमुख आशिष रेग्मीले जानकारी दिए।

यी कार्यपत्रहरूलाई दस्तावेजीकरण गर्नुका साथै पार्टीलाई सुझावको रूपमा दिइने र यसले पार्टीका लागि निर्णय लिन आधारशीलाको काम गर्ने रेग्मीको भनाइ छ।

असोज १ गते प्रतिष्ठानले विभिन्न पार्टीका प्रतिनिधि, कानुनविद, संविधानविद, वरिष्ठ पत्रकार, पार्टी पदाधिकारी र नेताहरू सम्मिलित संविधान कार्यन्वयनका १० वर्षको समीक्षा गर्दै अबको बाटोबारे अन्तरक्रिया कार्यक्रम आयोजना गरेको थियो।

कार्यक्रमका वक्ताहरूले विगतका कामहरूको सह्राहना गर्दै जलवायु परिवर्तन, रेजिलियन्ट सिटी, अर्थतन्त्रमा सुधार गर्न अपनाउनुपर्ने नीति, हालको समाजको वर्ग विश्लेषण, नेपाली विशेषतासहितको समाजवादजस्ता विषयमा अध्ययन अनुसन्धान गर्नुपर्ने आवश्यकता दर्शाए।

कार्यक्रममा प्रतिष्ठानका निर्देशक समिति सदस्यहरू र प्रतिष्ठानका विभिन्न डेस्कमा आबद्ध विज्ञ सदस्यहरूको उपस्थिति थियो। प्रतिष्ठानका अध्यक्ष ईश्वर पोखरेलले कार्यप्रगतिमा खुसी व्यक्त गरेका थिए। यस्तै राजन भट्टराई, युवराज खतिवडा, दिनेश दवकोटालगायत निर्देशक समिति सदस्यहरू र डेस्कका विज्ञ सदस्यहरूले आआफ्नो डेस्कको कार्यप्रगति र भावी रणनीतिबारे प्रस्ट पारेका थिए।

नीति अध्ययन तथा अनुसन्धान प्रतिष्ठान एमालेको थिंक ट्यांक संस्था हो। यसले पार्टीलाई विभिन्न विधा र नीतिगत क्षेत्रमा सुझाव दिने गरेको छ।