काठमाडौं १६ कात्तिक । गत सोमबारदेखि मुग्निलबाट बेपत्ता भएकी १९ वर्षीया छात्रा बिपना चौधरीको शव फेला परेको छ । नवलपुरको कुमारवर्ती माध्यमिक विद्यालय, मध्यविन्दु(२ कोल्हुवामा कक्षा १२ मा अध्ययनरत मध्यविन्दु नगरपालिका(४ लुस्लहरीकी बिपना मुग्लिनबाट बेपत्ता हुनुभएको थियो ।

बिहीबार साँझ ६ बजेतिर नारायणी नदीको किनार मध्यविन्दु १५ को कोलकट्टा क्षेत्रको किनारमा माछा मार्ने बोटेहरूले उहाँको शव देखेर प्रहरीलाई खबर गरेका थिए । उहाँको शव राति नै मध्यविन्दु जिल्ला अस्पताल डन्डामा ल्याई पोष्टमार्ट गरिएको र शव बिपनाकै भएको पुष्टि भएको जिल्ला प्रहरी कार्यालयका प्रहरी नायव उपरीक्षक जेसी शाहले जानकारी दिनुभयो ।

क्याम्पसबाट कक्षा ११ र १२ का विद्यार्थी पिकनिक खान कात्तिक १२ गते तनहुँको बन्दिपुर गएर फर्कँदै थिए । फर्कने क्रममा नारायणघाट–बुटवल सडक खण्डको तीन नम्बर पुलमा शौच गर्न भनेर गएकी बिपना त्यसपछि बेपत्ता हुनुभएको थियो । प्रहरीले घटनाका बारेमा अनुसन्धान भइरहेको जनाएको छ ।