काठमाडौं २ माघ । प्रधानमन्त्री केपी शर्मा ओलीले भूकम्पजस्ता प्राकृतिक विपद्बाट जोगिनका लागि सबै क्षेत्रबाट प्रभावकारी पूर्वतयारी गरिनुपर्ने बताउनुभएको छ ।

२७औं राष्ट्रिय भूकम्प सुरक्षा दिवसका सन्दर्भमा राष्ट्रिय विपद् जोखिम न्यूनीकरण तथा व्यवस्थापन प्राधिकरणले आज कीर्तिपुरमा आयोजना गरेको मूल समारोहमा प्रधानमन्त्री ओलीले भूकम्प प्रतिरोधी घर र संरचना बनाउन सरकारले नियमन गर्ने कुरासँगै सबै सचेत हुनुपर्ने बताउनुभयो । २०७२ सालको भूकम्पपछि निर्माणको क्षेत्रमा राम्रा उपलब्धि भएको भन्दै उहाँले अझ व्यवस्थित गर्नुपर्ने बताउनुभयो ।

यस्तै गृहमन्त्री रमेश लेखकले भूकम्प तथा विपद् न्यूनीकरणका लागि नयाँ प्रविधिको प्रयोगमा जोड दिइने बताउनुभयो ।

१९९० साल माघ २ गतेको महाभूकम्पको सम्झनामा सरकारले २०५५ सालदेखि राष्ट्रिय भूकम्प सुरक्षा दिवस मनाउन थालेको हो । यस वर्ष ‘भूकम्पले सिकाएको पाठ, बलियो संरचना र सुदृढ पूर्वतयारीका साथ’ भन्ने मुख्य नारासहित विभिन्न कार्यक्रम आयोजना भएको छ ।