काठमाडौं २० माघ । प्रतिनिधिसभाको शिक्षा, स्वास्थ्य तथा सूचना प्रविधि समिति सभापति अम्मरबहादुर थापाले बैठकमा ढिला आएपछि माफी मागेका छन् ।
आइतबार शहीद दशरथ चन्द स्वास्थ्य विज्ञान विश्वविद्यालय विधेयकमाथि दफावार छलफल थियो । साढे १२ बजेका लागि बैठक बोलाइएको थियो ।
शिक्षा, विज्ञान तथा प्रविधि मन्त्री विद्या भट्टराई, समिति सदस्य र मन्त्रालयका सचिव लगायतका कर्मचारी समयमै समिति बैठकमा पुगेका थिए ।
सभापति थापालाई कुर्न परेपछि केही सांसद निस्कन पनि लागेका थिए । सभापति थापा समिति बैठकमा १ः२० तिर मात्र आइपुगे ।
बैठकको सुरुमै एमाले सांसद छविलाल विश्वकर्माले ढिला आउनुको कारण र सभापतिको स्वास्थ्यस्थिबारे प्रश्न गरे ।
‘सभापतिको स्वास्थ्य स्थिति कस्तो छ रु त्यसपछि अगाडि बढौंला,’ समिति सदस्य विश्वकर्माले भने ।
सभापति थापाले बिहान कार्यक्रममा गएको र टेकुमा आफू सवार गाडीलाई बाइकले ठक्कर दिएपछि ढिलाइ भएको समितिलाई जानकारी गराए ।
‘दुई वटा कार्यक्रम थियो । बैठकमा समयमै आइपुग्ने भनेर पौने १२ बजे नै कीर्तिपुरबाट हिँडेको हो । टेकुमा आइपुगेपछि एउटा मोटरसाइकलले गाडीलाई हान्यो । १०–१५ मिनेट त्यहाँ लफडा भयो,’ सभापति थापाले ढिलाइ हुनुको कारण समितिलाई सुनाए ।
त्यसपछि सभापति थापाले अबदेखि आफूबाट कमजोरी नहुने समितिलाई आश्वासन दिए ।
‘सबैभन्दा अगाडि सभापति आउनुपर्छ । आगामी दिनमा म बाट त्यस्तो कमजोरी हुने छैन,’ सभापति थापाले भने ।
सभापति थापाले माफी मागेपछि शहीद दशरथ चन्द स्वास्थ्य विज्ञान विश्वविद्यालय विधेयकमाथि दवाफर छलफल सुरु भएको छ ।
आइतबारको बैठकले परिच्छेद २ को दफा ३,४ र ५ पारित गरेको छ ।
प्रतिक्रिया दिनुहोस्