काठमाडौं ३० माघ । अर्थमन्त्री विष्णुप्रसाद पौडेलले तीव्र विकासमार्फत सन् २०२६ सम्म नेपाललाई विकासशील राष्ट्र बनाउने बताएका छन् । बुधबार माप्यदूधकोशी गाउँपालिकाको अध्यक्ष कप तथा राष्ट्रपति रनिङशिल्ड प्रतियोगिताको उद्घाटन गर्दै अर्थमन्त्री पौडेलले वर्तमान सरकार भौतिक र मानवीय विकासमा लागिपरेको र देशको अर्थतन्त्र चलायमान भएको बताएका हुन् ।

विदेशमा भएका युवालाई नेपाल भित्र्याएर समृद्ध देश बनाउने सरकारको उद्देश्य रहेको अर्थमन्त्री पौडेलको भनाइ छ । वर्तमान सरकारले विकास निर्माणको काम गरेकाले सन् २०२६ सम्म नेपाल विकासशील सूचीमा समावेश हुने ठोकुवा गरे । कांग्रेस(एमालेको सरकारले देशलाई स्थायित्व दिने उनको दाबी छ ।

सरकारले सोलुखुम्बु र मुस्ताङमा हाई अल्टिच्युड रंगशाला बनाउनेसमेत अर्थमन्त्री पौडेलले घोषणा गरेका छन् । दुई जिल्लाको उच्च स्थानमा रंगशाला बनाउन बजेट विनियोजन गर्ने भन्दै अर्थमन्त्रीले खेलकुद पर्यटनको विकासमा सरकार दृढ रहेको बताए । अब हाई अल्टिच्युडमा खेल खेल्न विश्वभरका मान्छे नेपाल आउने उनको कथन छ ।

कार्यक्रममा रक्षामन्त्री मानवीर राइले सोलुखुम्बुको भौतिक विकासमा आफूले सक्दो पहल गरेको बताए । गाउँपालिका अध्यक्ष बुद्धिकिरण राइले सल्लेरी(माप्य(लुक्ला सडकखण्ड कालोपत्र गर्न माग गरे ।