काठमाडौं ३ फागुन । चालु आर्थिक वर्षको सात महिनामा नेपाललाई करिब २७ अर्ब रुपैयाँ बराबरको विदेशी लगानी प्रतिबद्धता प्राप्त भएको छ ।

साउनदेखि माघसम्म तीन सय ८६ उद्योगका लागि २६ अर्ब ८४ करोड १७ लाख रुपैयाँ बराबरको लगानी प्रतिबद्धता आएको उद्योग विभागले जनाएको छ ।

विभागका अनुसार प्रमाणीकरण ९स्वीकृति० प्रणालीबाट दुई सय ११ उद्योगका लागि २४ अर्ब २१ करोड ३४ लाख ७६ हजार रुपैयाँ तथा स्वचालित प्रणालीबाट एक सय ७५ उद्योगका लागि २ अर्ब ६२ करोड ८२ लाख रुपैयाँ बराबरको लगानी प्रतिबद्धता आएको हो ।

सात महिनाको अवधिमा तीन सय ७५ वटा साना उद्योग, सात वटा मध्यम र चार वटा ठूला उद्योगका लागि लगानी प्रतिबद्धता आएको हो । सात महिनामा प्राप्त प्रतिबद्धता बमोजिम लगानी भित्रिएमा थप १० हजार सात सय २६ जनाले रोजगारी पाउनेछन् ।

माघ महिनामा मात्रै ३२ उद्योगका लागि १ अर्ब ६ करोड ५२ लाख ४५ हजार रुपैयाँ बराबरको लगानी प्रतिबद्धता आएको विभागले जनाएको छ । माघमा ३३ वटा साना उद्योग, दुई वटा मध्यम र एउटा ठूला उद्योगका लागि लगानी प्रतिबद्धता आएको हो ।

विभागका अनुसार सात महिनाको अवधिमा सबैभन्दा धेरै लगानी प्रतिबद्धता पर्यटन क्षेत्रमा प्राप्त भएको छ । सात महिनामा आएको कुल लगानी प्रतिबद्धतामध्ये पर्यटन क्षेत्रमा ४४ प्रतिशत अर्थात एक सय ६८ वटा उद्योगहरुका लागि आएको छ ।

यस्तै, सूचना प्रविधि क्षेत्रमा ३५ प्रतिशत अर्थात् एक सय ३४ वटा उद्योगका लागि लगानी प्रतिबद्धता आएको छ । विभागका अनुसार सेवा क्षेत्रका लागि ४८ वटा अर्थात १२ प्रतिशत, उत्पादन क्षेत्रका २७ वटा अर्थात ७ प्रतिशत, कृषिका ६ वटा अर्थात २ प्रतिशत तथा पूर्वाधार क्षेत्रको दुई उद्योगका लागि वैदेशिक लगानी प्रतिबद्धता प्राप्त भएको छ ।