काठमाडौं २ बैशाख । नेपाल पत्रकार महासंघले राजावादीको प्रदर्शनका क्रममा जलाएर हत्या गरिएका पत्रकार सुरेश रजक र प्रेस स्वतन्त्रताबारे सम्पादकहरूसँग छलफल गरेको छ।
मंगलबार नेपाल पत्रकार महासंघको केन्द्रीय कार्यालयमा भएको छलफलमा सम्पादकहरुले दिवंगत रजकलाई न्याय दिन महासंघले नेतृत्व लिनुपर्ने सुझाव दिएका छन्।
छलफल अनलाइनखबर डटकमका सम्पादक वसन्त बस्नेतले राजावादीहरुको आन्दोलन लोकतान्त्रिक र शान्तीपूर्ण ढंगले गरिएको आन्दोलन नभएको भन्दै अहिले पत्रकारहरुमाथि ह्यारेसमेन्ट भइरहेको दाबी गरे।

‘नेपाल पत्रकार महासंघले नेतृत्व गरोस्, हामी साथ दिन तयार छौं,’ उनले भने, ‘अहिले पत्रकारहरुमाथि नै ह्यारेसमेन्ट भइरहेको छ। रिपोर्टिङ गर्न जाँदा हुने जटिलतामा पनि महासंघले विचार गरिदियोस्।’

कान्तिपुर पब्लिकेशनका उपसम्पादक जनकराज सापकोटाले सुरेश रजक मृत्यु प्रकरणलाई अपराधको रुपमा व्याख्या गर्दै न्यायिक माध्यमबाट न्यायका लागि पहल गर्न आग्रह गरे।
‘नेपाल पत्रकार महासंघले अभिभावकत्व लिएर सेफ्टी तालिमको व्यवस्था गर्नुपर्छ,’ उनले भने, ‘सुरेश रजकको घटनामा चाँही क्रिमिनल प्रोसिडिङ नै हो भन्ने हाम्रो माग हुनुपर्छ। महासंघले चाहीँ त्यसको छानविन गरेर क्षतिपुर्ति मात्रै माग गर्ने होइन कि त्यो क्राइम नै हो र त्यसको सत्यतथ्य छानविन गरेर दोषिलाई न्यायिक प्रोसेसबाट क्रिमिनलाइज गर्नुपर्छ।’

नेपाल पत्रकार महासंघका महासचिव रामप्रसाद दाहालले सुरेश रजकको न्यायको लागि आवश्यक पहल भइरहेको जानकारी दिए। आइन्दा प्रदर्शनहरुमा समाचार संकलनका लागि पत्रकार पठाउँदा सजग रहनुपर्ने उनको भनाइ छ।

उनले सम्पादकहरुको सुझाव र सल्लाका आधारमा महासंघ अघि बढ्ने समेत जानकारी दिए।