बुटवल, ९ चैत्र
तेस्रो भण्डारी अन्तराष्ट्रिय गोल्डकप नकआउट फुटबल प्रतियोगिताको उद्घाटन खेलमा आयोजक मदन भण्डारी स्पोर्ट्स् एकेडेमी काठमाडौंले विजयी शुरुवात गरेको छ ।
बुटवलको रामनगरस्थित मानविज्ञान माविको मैदानमा भएको खेलमा सुदुर पश्चिम ११ लाई ५–१ गोल अन्तरले हराउंदै आयोजक क्वाटर फाइनलमा प्रवेश गरेको छ । मध्यान्तर अघि एक–एक गोलको बराबरी भएकोमा दोस्रो हाफमा आयोजक टिमले एकतर्फी चार गोल गरेको थियो । तीन विदेशी खेलाडीसहित मैदानमा उत्रिएको आयोजकको जितमा प्रकाश बुढाथोकीले खेलको १८ औं र ६४औं मिनेटमा दुई गोलको योगदान गरे भने विदेशी खेलाडी अबाले ७१ औं मिनेटमा, विशव अधिकारीले ७७ औं मिनेटमा र दिपेश आलेले ८९ औं मिनेटमा गोल गरे । सुदुर पश्चिमका लागि एक मात्र सान्त्वना गोल पूर्ण अन्जन बैंजूले ४४ औं मिनेटमा गरेका थिए । प्रतियोगिताको दोस्रो खेल आइतबार झापा ११ र एपीएफ क्लबबीच हुनेछ ।
यस अघि प्रतियोगिताको राष्ट्रपति विद्यादेवी भण्डारीले उद्घाटन गर्नुभएको थियो । उदघाटन कार्यक्रममा बोल्दै ५ नम्बर प्रदेश सरकारका मुख्य मन्त्री शंकर पाखरेलले खेलकुदको बिकासले समाजलाई प्रतिस्पर्धा र एकता सिकाउने भएकाले खेलकुदको महत्वलाई प्रदेश सरकारले प्राथमीकतामा राख्ने बताउनु भयो ।
एक करोड बढी खर्चमा संचालन भएको प्रतियोगिताको विजेताले १५ लाख र उपविजेताले ७ लाख ५० हजार नगद पुरस्कार प्राप्त गर्नेछन् । आयोजकका अनुसार सेमिफाइनल पुग्ने टिमले १÷१ लाख पाउनेछन् भने उत्कृष्ट खेलाडीलाई समेत नगद पुरस्कार प्रदान गरिने छ ।
प्रतियोगितामा नेपाल आर्मी, थ्रि स्टार, मलेसियाको हिमालयन फुटवल क्लव, झापा ११, एपिएफ क्लव, सुनौलो संगम, मनाङ मस्र्याङदी र नेपाल प्ुलिस सहभागि हुनेछन् । प्रतियोगिताको फाइनल चैत १९ गते हुनेछ ।