काठमाडौ ३० जेठ । नेपाली कांग्रेसका नेता बलबहादुर केसी नेतृत्वको टोली चीन भ्रमणमा गएको छ । कांग्रेस नेता केसी नेतृत्वको १७ सदस्यीय टोली गएराति चीन प्रस्थान गरेको हो ।

चीनको कम्युनिस्ट पार्टी सीपीसी को अन्तर्राष्ट्रिय विभागको निम्तोमा उनीहरु पाँचदिने भ्रमणका लागि चीन गएका हुन् ।

चीन जानुअघि केसीले बिहीबार बिहान पार्टी सभापति शेरबहादुर देउवा, महामन्त्री गगन थापा, डा। शेखर कोइराला लगायतसँग भेटेका थिए ।

यसअघि, सुजाता कोइरालाको नेतृत्वमा कांग्रेसका १५ सदस्यीय टोलीले चीन भ्रमण गरेको थियो ।

केही हप्ता अघिमात्रै पूर्वराष्ट्रपति विद्यादेवी भण्डारीले एमाले नेताको हैसियतमा चीन भ्रमण गरेकी थिइन् । भण्डारीभन्दा अगाडि माओवादी केन्द्रका सचिव दिनानाथ शर्मा नेतृत्व गरेको टोलीले पनि चीन भ्रमण गरेको थियो ।

अब छिट्टै एमाले उपाध्यक्ष एवम् उपप्रधान तथा अर्थमन्त्री विष्णु पौडेल नेतृत्वको टोली पनि चीन जाँदैछ । उनको भ्रमण अघिल्लोपटक बसेको मन्त्रिपरिषद बैठकले स्वीकृत गरिसकेको छ ।