काठमाडौ ८ असार । सत्तारुढ नेकपा एमालेका सांसद सूर्यबहादुर थापाले दिवंगत नेता गणेशमान सिंहको सम्मानलाई केही बजेटमा साट्न खोजिएको भन्दै त्यो गलत भएको बताएका छन्।

आइतबार प्रतिनिधिसभा बैठकमा बजेटमाथिको छलफलमा भाग लिँदै थापाले जनआन्दोलनको सर्वोच्च कमाण्डरलाई केही करोड कममा मात्रै सीमित गर्न नहुने बताए।

‘लौह पुरुष गणेशमान सिंह, २०४६ सालको जनआन्दोलनको सर्वोच्च कमाण्डर गणेशमान सिंह,’ थापाले भने, ‘उहाँलाई म शिर झुकाएर सम्मान गर्छु। तर, सहरी बिकास मन्त्रालयको बजेट हेर्छु त गणेशमान सिंहको सम्मान केही केही जिल्लामा केही केही छरिएको रकममा खोज्न चाहेको पाएँ मैले।’

उनले थपे, ‘प्रकाशमान सिंह उहाँको छोरा हुनुहुन्छ भनेर साथीहरुले सुनाउनुभयो। हुनुहुन्छ कि हुनुहुन्न मलाई त्यो थाहा छैन। तर, झण्डै ७५ करोड रकममा गणेशमान सिंहको सम्मानलाई साट्नेगरी बजेट बिनियोजन भएको छ। यो गलत भएको छ। यो खालको गर्नु गलत भएको छ।’

गणेशमान सिंहको सम्मान नहुने योजनाम समेत नाम जोडेर कतिपय योजना आएको भन्दै थापाले आश्चर्य प्रकट गरे।