काठमाडौँ ७ साउन । सत्तारुढ नेकपा एमालेले पूर्वराष्ट्रपति तथा पूर्व उपाध्यक्ष विद्या भण्डारीलाई पार्टी राजनीतिमा नआउन आग्रह गर्ने निर्णय गरेको छ । भण्डारीले अध्यक्ष केपी शर्मा ओलीको सुझावलाई बेवास्ता गर्दै चुनौती दिएकाले पार्टीमा नफर्कन आग्रह गर्ने केन्द्रीय कमिटीले निर्णय गरेको प्रचार विभाग प्रमुख राजेन्द्र गौतमले बताए ।

‘पार्टी अध्यक्षले दिएका सुझाव र त्यसको जवाफको प्रतीक्षामा रहेको अवस्थामा उहाँले पत्रकार सम्मेलन गरेर केन्द्रीय कमिटीको बैठकलाई नै चुनौती दिएकोले बैठकले पूर्वराष्ट्रपति विद्यादेवी भण्डारीलाई पार्टीमा नफर्कन, आफ्नो गरिमाअनुरूप पूर्वराष्ट्रपतिको हैसियतमा सल्लाहकार र अभिभावक बनेर बस्न आग्रह गर्ने निर्णय सुनाइयो,’ एक केन्द्रीय सदस्यले बैठकपछि भने ।

अध्यक्ष ओलीले भण्डारीलाई राजनीतिमा नफर्कन पार्टीले आग्रह गर्ने निर्णय सुनाएका थिए । उनले भने, ‘पूर्वराष्ट्रपति राजनीतिमा आउन हुँदैन, मिल्दैन ।’
तीन नेताको नोट अफ डिसेन्ट
भण्डारीलाई पार्टी राजनीतिमा फर्किन रोक्ने अध्यक्षको निर्णयमाथि उपाध्यक्षद्धय युवराज ज्ञवाली र सुरेन्द्र पाण्डे तथा पोलिटव्युरो सदस्य कर्ण थापाले नोट अफ डिसेन्ट जनाएका छन् ।
दुई दिनसम्म चलेको बैठक मध्यराती होहल्लाका बीच अध्यक्ष ओलीले समापन भएको घोषणा गरेका थिए ।

एमालेले यस्तो निर्णय गर्नुअघि भण्डारीलाई सक्रिय राजनीतिमा आउन रोक्न नहुनेमा केही केन्द्रीय सदस्यहरू उभिएका थिए । तर उनीहरूको आवाज अल्पमतमा पर्‍यो केन्द्रीय कमिटी बैठकमा भण्डारीको पक्षमा उभिने केन्द्रीय सदस्यहरूमा उषाकिरण तिम्सिना,कैलाश ढुङ्गेल, इन्द्रलाल सापकोटा, रचना खड्का, अरबिन्द सिंह, युवराज बाँस्कोटा, रामलाल साह, बिनादेवी राई, शिव सुवेदी, कैलाश ढुङ्गेल, शिव सुवेदी, केदार न्यौपाने, पार्वती रावल लगायत रहेका थिए ।