काठमाडौं, २२ चैत । नेपाली यू–१९ राष्ट्रिय फुटबल टिमका कप्तान तथा गोलकिपर अर्पण कार्की माल्दिभ्सको क्लब जेजे स्पोर्टससँग आबद्ध भएका छन्।

आगामी ९ अप्रिलबाट सुरु हुने माल्दिभ्सको दोस्रो डिभिजनको लिग खेल्नका लागि उनी माल्दिभ्सको राजधानी माले पुगिसकेका छन्। अहिले उनलाई प्रशिक्षणमा सहभागी गराईएको छ ।

अर्पणले माल्दिभ्समा गएर लिग खेल्न पाउँदा आफ्नो खेल करिअरले उचाइ लिने विश्वास गरेका छन्। ‘अनुभव र केही नयाँ सिक्नका लागि यहाँ आएको हुँ’,अर्पणले भने, ‘जेजे स्पोर्टसले मलाई ठूलो मौका दिएको छ। यहाँ आउँदा आफूलाई भाग्यमानी ठानेको छु।’

दोस्रो डिभिजनको लिग सिजन २ महिनासम्म चल्नेछ। लिगमा अर्पण आबद्ध जेजे स्पोर्टससँगै ९ वटा क्लबले लिगमा प्रतिस्पर्धा गर्नेछन्। उनी सिजनभरिका लागि आबद्ध भएका हुन्। सम्झौता रकम भने खुलाइएको छैन।

अघिल्लो सिजन नेपाली राष्ट्रिय टिमका गोलकिपर किरण चेम्जोङले पनि माल्दिभ्सको पहिलो डिभिजनको क्लब टिसी स्पोर्टसबाट खेलेका थिए।