काठमाडौं, ४ चैत । राष्ट्रिय स्वतन्त्र पार्टी (रास्वपा) का सभापति रवि लामिछाने ले पार्टीभित्र ‘राइट टु रिकल’ (जनताले प्रतिनिधि फिर्ता बोलाउने अधिकार) कडाइका साथ लागू गरिने घोषणा गर्दै नवनिर्वाचित सांसदहरूलाई अनुशासनमा रहन कडा चेतावनी दिनुभएको छ।

सांसदहरूको अभिमुखीकरण कार्यक्रमलाई सम्बोधन गर्दै उहाँले रास्वपा अब “क्लोज क्याम्प” जस्तो संरचनामा प्रवेश गरेको उल्लेख गर्दै पार्टीभित्र अनुशासनहीनता कुनै हालतमा सह्य नहुने स्पष्ट पार्नुभयो।

‘राइट टु रिकल’ अब व्यवहारमै

सभापति लामिछानेले पार्टीको विधानमा रहेको ‘राइट टु रिकल’ यसपटक व्यवहारमै लागू हुने बताउँदै सांसदहरूलाई स्वतन्त्रता र जिम्मेवारी सँगसँगै प्रयोग गर्न निर्देशन दिनुभयो।
उहाँले भन्नुभयो—स्वतन्त्रता दुरुपयोग भए पार्टीले कारबाही गर्न पछि नहट्नेछ।

गुटबन्दी र स्वार्थ राजनीतिमा रोक

रास्वपाभित्र विभिन्न पृष्ठभूमिबाट आएका प्रतिनिधिहरू रहेको उल्लेख गर्दै उहाँले सबैलाई एउटै लक्ष्यमा केन्द्रित गर्न अनुशासन अनिवार्य भएको बताउनुभयो।
पुराना दलझैँ गुटबन्दी, शक्ति संघर्ष र ‘म–केन्द्रित’ राजनीतिमा लागे परिणाम झन् खराब हुने चेतावनी दिँदै देशलाई केन्द्रमा राखेर काम गर्न निर्देशन दिनुभयो।

सांसदको मुख्य काम: कानुन निर्माण

सांसदहरूको प्रमुख जिम्मेवारी कानुन निर्माण भएको स्मरण गराउँदै उहाँले विचौलियासँगको साँठगाँठ, शक्ति दौडधुप र ‘फोटो राजनीति’ बन्द गर्न आग्रह गर्नुभयो।
“जनताको घरमा पानी, बिजुली र इन्टरनेट कसरी पुग्छ—त्यो थाहा हुने सांसद चाहिन्छ,” उहाँले भन्नुभयो।

सार्वजनिक अभिव्यक्तिमा कडाइ

सांसदहरूलाई सामाजिक सञ्जाल र सार्वजनिक अभिव्यक्तिमा अत्यन्त सावधानी अपनाउन निर्देशन दिँदै उहाँले हल्का टिप्पणीले देशको कूटनीति र अर्थतन्त्रमा असर पार्न सक्ने चेतावनी दिनुभयो।

मन्त्री बन्ने दौडमा रोक

सरकार गठनको सन्दर्भमा सांसदहरूबीच देखिएको आकांक्षालाई संकेत गर्दै उहाँले ‘मन्त्री बनाइदिनुस्’ भन्दै लबिङ वा मिडिया ट्रायल नगर्न स्पष्ट निर्देशन दिनुभयो।
मन्त्री चयन क्षमता र योग्यताका आधारमा हुने भन्दै कसैलाई भनसुन गर्न नपर्ने बताउनुभयो।

जनताको जीवनसँग जोडिन आग्रह

सांसदहरूलाई सकेसम्म सरकारी अस्पतालमै उपचार गराउन सुझाव दिँदै जनताले भोग्ने दुःख आफैंले अनुभूति गर्नुपर्ने धारणा राख्नुभयो।
त्यसैगरी, संसद बाहिरको समयमा गाउँ–टोलमा पुगेर नागरिकका समस्या सुन्न आग्रह गर्नुभयो।

संविधानप्रति प्रतिबद्धता

सभापति लामिछानेले वर्तमान संविधान र व्यवस्थाप्रति रास्वपा पूर्ण प्रतिबद्ध रहेको दोहोर्याउँदै आवश्यक परे सुधारका लागि खुला रहेको स्पष्ट पार्नुभयो।

लगानी र अर्थतन्त्रमा सन्देश

निजी क्षेत्र, गैरआवासीय नेपाली र अन्तर्राष्ट्रिय समुदायलाई नेपालमा निर्धक्क लगानी गर्न आह्वान गर्दै उहाँले लगानीको सुरक्षामा राज्यको नीति नै ग्यारेन्टी हुने बताए।

रास्वपाले प्राप्त जनमतलाई ‘जिम्मेवारीको परीक्षा’ का रूपमा लिँदै पार्टीभित्र कडा अनुशासन, पारदर्शिता र जनउत्तरदायित्व स्थापित गर्ने स्पष्ट संकेत सभापति लामिछानेको सम्बोधनले दिएको छ।