काठमाडौँ, — सुकुमवासी बस्ती खाली गराउने सरकारको निर्णयविरुद्ध राजधानीको थापाथली क्षेत्रमा शुक्रबार प्रदर्शन चर्किएको छ। स्थानीय बासिन्दा र युवाहरूले सरकारविरुद्ध नारा लगाउँदै विरोध जनाएका छन्।

प्रदर्शनकारीहरूले “डोजर आतंक बन्द गर”, “सुकुमवासीको आवास अधिकार सुनिश्चित गर” र “निरंकुश निर्णय खारेज गर” जस्ता नारा लगाइरहेका छन्।

प्रदर्शनका क्रममा उनीहरूले राष्ट्रिय स्वतन्त्र पार्टीका सभापति रवि लामिछानेलाई लक्षित गर्दै ‘छाती थाप्न आउनू’ भन्दै नाराबाजी गरेका छन्। सरकारमा जानुअघि लामिछानेले सुकुमवासी बस्तीमा डोजर चलाए आफू प्रतिरोध गर्न जाने बताएका थिए। तर अहिले उनकै पार्टीका वरिष्ठ नेता तथा प्रधानमन्त्री बालेन शाह नेतृत्वको सरकारले बस्ती हटाउने निर्णय गरेपछि प्रदर्शनकारीहरू आक्रोशित बनेका हुन्।

सरकारले बिहीबार साँझदेखि थापाथली, शंखमूल, शान्तिनगर र मनोहरा क्षेत्रका बस्ती खाली गराउन माइकिङ सुरु गरेको थियो। शुक्रबार बिहानदेखि केही बासिन्दाले सामान सार्न थालेका छन् भने केहीले बस्ती नछोड्ने अडान राख्दै विरोध प्रदर्शनलाई निरन्तरता दिएका छन्।

राष्ट्रिय जेनजी नागरिक अभियानको अगुवाइमा भइरहेको प्रदर्शनलाई माइतीघर मण्डलासम्म लैजाने तयारी गरिएको छ।

यसअघि वैशाख ९ गते प्रधानमन्त्री बालेन शाहले सुरक्षा निकायका प्रमुखहरूलाई बोलाएर सुकुमवासी बस्ती खाली गराउने निर्देशन दिएका थिए। सोही निर्देशनअनुसार काठमाडौँका प्रमुख जिल्ला अधिकारी ईश्वरराज पौडेलको अध्यक्षतामा बसेको जिल्ला सुरक्षा समितिको बैठकले बस्ती हटाउने निर्णय गरेको थियो। बैठकमा काठमाडौं महानगरपालिकाकी कार्यवाहक मेयर सुनिता डंगोलसहित सुरक्षा अधिकारीहरूको उपस्थिति रहेको थियो।

प्रशासनले पहिलो चरणमा उपत्यकाका चार सुकुमवासी बस्तीमा डोजर प्रयोग गर्ने तयारी गरेको जनाएको छ। सूचना पाएपछि कतिपय बासिन्दाले आफ्ना सामान सुरक्षित स्थानतर्फ सारिरहेका छन् भने अन्यले सरकारी निर्णयको अवज्ञा गर्ने तयारी गरेका छन्।

देशभर करिब १२ लाख भूमिहीन दलित, सुकुमवासी तथा अव्यवस्थित बसोवासी रहेको अनुमान छ। यस घटनाले सुकुमवासी व्यवस्थापन, आवास अधिकार र राज्यको भूमिकाबारे पुनः बहस चर्काउने संकेत गरेको छ।