फाइनान्सबाहेक सबै उपसमूह राताम्मे

काठमाडौँ । साताको पहिलो कारोबार दिन सोमबार सेयर बजारमा गहिरो मन्दी छाएको छ। लगातार तेस्रो कारोबार दिन पनि बजार ओरालो लाग्ने क्रम जारी रहँदा नेपाल स्टक एक्सचेन्ज (नेप्से) परिसूचक २० अंकभन्दा बढीले घटेको छ भने कारोबार रकममा पनि उल्लेख्य गिरावट आएको छ।

सोमबार नेप्से परिसूचक २०.२७ अंकले घटेर २७३५.०० विन्दुमा ओर्लिएर बन्द भएको छ। यसअघि गत हप्ताको बिहीबार १३ अंक र शुक्रबार ११ अंकले बजार घटेको थियो।

डेढ अर्बभन्दा बढीले खुम्चियो कारोबार

बजार परिसूचकसँगै आज कारोबार रकममा पनि ठुलो गिरावट आएको छ। अघिल्लो कारोबार दिन ५ अर्ब ६१ करोड रुपैयाँको सेयर खरिदबिक्री भएकोमा आज १ अर्ब ५३ करोड रुपैयाँले कमी आई ४ अर्ब ८ करोड रुपैयाँमा सीमित भएको छ।

आज बजार सुरु भएको ५ मिनेटपछि नै ओरालो लाग्न थालेको परिसूचक कारोबारको अन्तिम समयसम्म नै रातो (घट्दो) अंकमा रह्यो। दिनभर कुल २४१ कम्पनीको सेयर कारोबार भएकोमा ४१ कम्पनीको मूल्य बढ्यो, २२३ कम्पनीको घट्यो भने ६ कम्पनीको मूल्य स्थिर रह्यो।

फाइनान्सबाहेक सबै उपसमूह राताम्मे

सोमबारको बजारमा फाइनान्स उपसमूह मात्र ०.२६ प्रतिशतले बढेर हरियो रहन सफल भयो। यसबाहेकका अन्य सबै १२ वटा उपसमूहका सूचकहरू घटेका छन्।

विशेष गरी व्यापार, अन्य र विकास बैंक उपसमूहमा १ प्रतिशतभन्दा बढीको गिरावट देखिएको छ।

उपसमूहगत उतारचढाव तालिका:

कमाउने र गुमाउने प्रमुख कम्पनीहरू

बजार घटे पनि केही कम्पनीका लगानीकर्ताले भने राम्रो नाफा कमाएका छन्। कालिन्चोक हाइड्रोपावरको सेयर मूल्य सबैभन्दा धेरै १५ प्रतिशतले वृद्धि भएको छ। त्यस्तै, क्रेस्ट माइक्रोलाइफ इन्स्योरेन्सको १३.११ प्रतिशत, सोपान फर्मास्युटिकल्सको ९.९८ प्रतिशत र सामुदायिक लघुवित्तको ८.८५ प्रतिशतले मूल्य बढेको छ।

यता गुमाउनेतर्फ उपकार लघुवित्तका लगानीकर्ता अग्रस्थानमा रहे, जसको सेयर मूल्य ७.१४ प्रतिशतले घट्यो। साथै सयपत्री हाइड्रोपावरको ६.०१ प्रतिशत र सूर्यकुन्ड हाइड्रोको ३.७१ प्रतिशतले मूल्य ओरालो लागेको छ।

यी कम्पनीको भयो धेरै कारोबार

सोमबारको बजारमा कारोबार रकमका आधारमा सेन्ट्रल फाइनान्स, आँखुखोला जलविद्युत्, सिटी होटल, rिलायन्स स्पिनिङ मिल्स र नेसनल हाइड्रोपावर क्रमशः अग्रस्थानमा रहन सफल भए।