सुदूरपश्चिम । भूमि व्यवस्था, सहकारी, सङ्घीय मामिला तथा सामान्य प्रशासनमन्त्री प्रतिभा रावलले भूमिसम्बन्धी समस्या समाधान सरकारको उच्च प्राथमिकतामा रहेको बताएकी छन्।

कैलालीको धनगढी उपमहानगरपालिकामा आयोजित कार्यक्रममा बोल्दै मन्त्री रावलले अव्यवस्थित बसोबासी तथा भूमिहीन परिवारलाई लालपुर्जा वितरणका लागि आवश्यक सहजीकरण र समन्वय गर्न सरकार तयार रहेको बताइन्।

उनले विकासका अन्य कामसँगै भूमिसम्बन्धी समस्या समाधानलाई पनि प्राथमिकतामा राखेर काम गर्न स्थानीय तहलाई आग्रह गरिन्।

६०० दिनभित्र लालपुर्जा वितरण गर्ने लक्ष्य

यसअघि भूमि समस्या समाधान समिति कैलालीको बैठकमा मन्त्री रावलले ६०० दिनभित्र लालपुर्जा वितरण गर्ने लक्ष्यसहित सरकारले काम गरिरहेको जानकारी दिइन्।

भूमि समस्या समाधानका लागि आवश्यक स्रोतसाधन र जनशक्ति उपलब्ध गराउन सरकार तयार रहेको भन्दै उनले जिल्लाका सबै स्थानीय तहमा प्रभावकारी रूपमा काम अघि बढाउन समितिलाई आग्रह गरिन्।

समितिका अध्यक्ष एवं कैलालीका प्रमुख जिल्ला अधिकारी हीरालाल रेग्मीले जिल्लामा छिट्टै लालपुर्जा वितरण गर्ने तयारीबारे बैठकमा छलफल भएको जानकारी दिए।

मन्त्री रावलले कैलालीसँगै कञ्चनपुरमा पनि विभिन्न कार्यक्रममा सहभागी हुने कार्यतालिका रहेको जनाइएको छ।

Originally published on abcnews.com.np.