काठमाडौं ८ जेठ । नेपाल सम्पत्ति शुद्धीकरण तथा आतंकवादी वित्तीय लगानी नियन्त्रणसम्बन्धी अन्तरसरकारी निकाय Financial Action Task Force को ‘ग्रे लिस्ट’ बाट बाहिर निस्किन फेरि पनि असफल भएको छ। फ्रान्सको पेरिसमा सम्पन्न प्लेनरी तथा वर्किङ ग्रुप बैठकले नेपाललाई जोखिमपूर्ण सूची (ग्रे लिस्ट)मा यथावत राख्ने निर्णय गरेको हो।

एफएटीएफले सम्पत्ति शुद्धीकरण तथा आतंकवादी वित्तीय गतिविधि नियन्त्रणका लागि देशहरूको अवस्था ११ वटा प्रभावकारिता सूचक र ४० वटा प्राविधिक सूचकका आधारमा मूल्यांकन गर्छ। सो मूल्यांकनमा नेपालले आवश्यक सुधारहरू प्रभावकारी रूपमा कार्यान्वयन गर्न नसकेको निष्कर्ष निकालिएको छ।

नेपाल यसअघि सन् २००८ मा पनि ग्रे लिस्टमा परेको थियो भने सन् २०१४ मा सुधारपछि उक्त सूचीबाट बाहिरिएको थियो। तर त्यसयता पुनः नेपाल फेरि जोखिम सूचीमा पर्ने अवस्था दोहोरिएको छ।

सन् २०१२ मा नेपाल ब्ल्याक लिस्टमा पर्ने जोखिम नजिक पुगेको बेला International Monetary Fund को सहकार्य र सुधार प्रतिबद्धतापछि तत्कालीन संकट टरेको थियो।

एफएटीएफले नेपाललाई कानुन कार्यान्वयन, वित्तीय अनुगमन प्रणाली सुदृढीकरण तथा जोखिमयुक्त वित्तीय क्षेत्रको नियन्त्रणजस्ता क्षेत्रमा थप प्रभावकारी सुधार गर्न सुझाव दिएको छ। नेपाललाई ग्रे लिस्टबाट बाहिर निकाल्न सरकारलाई अबका महिनाहरूमा सुधार कार्यान्वयन तीव्र बनाउनुपर्ने चुनौती थपिएको छ।