काठमाडौं, १४ असार । पूर्वप्रधानमन्त्री तथा नेपाल कम्युनिष्ट पार्टी (नेकपा)का वरिष्ठ नेता झलनाथ खनालले महाकाली सन्धीले नेपाललाई उपलब्धिभन्दा बदनाम बढी दिएको टिप्पणी गर्दै वर्तमान राजनीतिक परिस्थितिमा वामपन्थी शक्तिहरूबीच दीर्घकालीन एकताको आवश्यकता औँल्याउनुभएको छ।

जननेता मदन भण्डारीको ७५औँ जन्मजयन्तीका अवसरमा काठमाडौंमा आयोजित ‘नेपालको कम्युनिस्ट आन्दोलन र जननेता मदन भण्डारी’ विषयक कार्यक्रममा बोल्दै खनालले महाकाली सन्धी र एमसीसी सम्झौताबाट नेपालले अपेक्षित लाभ प्राप्त गर्न नसकेको दाबी गर्नुभयो। मदन भण्डारी संसद्मा सक्रिय रहँदा टनकपुर सम्झौताविरुद्ध सशक्त संघर्ष भएको स्मरण गर्दै उहाँले भण्डारीले अघि सारेको राष्ट्रियताको धारालाई निरन्तरता दिन नसक्दा महाकाली सन्धी भएको बताउनुभयो।

उहाँले वर्तमान सरकारले राष्ट्रिय हित कमजोर पार्ने नीति अवलम्बन गरेको आरोप लगाउँदै किसान, श्रमिक, ट्रेड युनियन तथा विद्यार्थी संगठनका अधिकारमाथि हस्तक्षेप भइरहेको दाबी गर्नुभयो। निजी सञ्चारमाध्यमलाई दिइँदै आएको सहुलियत र सरकारी विज्ञापन कटौतीका कारण सञ्चार क्षेत्र कमजोर बन्दै गएको तथा पत्रकार बेरोजगार हुने जोखिम बढेको पनि उहाँको भनाइ थियो।

सोही कार्यक्रममा खनालले अहिलेको राजनीतिक परिस्थितिले फेरि एकपटक वाम एकताको आवश्यकता महसुस गराएको उल्लेख गर्दै नेकपा (एमाले) अध्यक्ष केपी शर्मा ओली र नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ एउटै मञ्चमा देखिनुलाई सकारात्मक संकेतका रूपमा व्याख्या गर्नुभयो। विचारको तहबाट सुरु भएको सहकार्यलाई दीर्घकालीन राजनीतिक एकतामा रूपान्तरण गर्नुपर्नेमा उहाँले जोड दिनुभयो।

देशमाथि साम्राज्यवादी र प्रतिक्रियावादी शक्तिहरूको दबाब बढिरहेको दाबी गर्दै उहाँले त्यसको सामना गर्न वामपन्थी शक्तिहरू एकजुट हुनुको विकल्प नरहेको बताउनुभयो।

खनालले संविधान संशोधनको बहसलाई पनि उठाउँदै संविधानलाई समयअनुसार परिमार्जन गर्न सकिने भए पनि स्थापित संवैधानिक प्रक्रिया र मापदण्डअनुसार मात्रै संशोधन गरिनुपर्ने धारणा राख्नुभयो। “संविधानलाई बाँदरको हातमा नरिवल बन्न दिनु हुँदैन,” भन्दै उहाँले अनाडी ढंगले गरिने संशोधनले मुलुकलाई सही दिशा नदिने चेतावनी दिनुभयो।

उहाँले वर्तमान संविधान, गणतन्त्र र राष्ट्रियतामाथि चुनौती बढ्दै गएको दाबी गर्दै देश गम्भीर राजनीतिक सङ्कटतर्फ उन्मुख भएको बताउनुभयो। यस्तो अवस्थामा वामपन्थी शक्तिहरू गोलबन्द भएर राष्ट्रियता जोगाउने र समाजवादको दिशामा अघि बढ्नुपर्ने उहाँको भनाइ थियो।

यसैबीच, जननेता मदन भण्डारीको हत्या नेपालको कम्युनिष्ट आन्दोलनलाई कमजोर पार्ने स्वदेशी तथा विदेशी प्रतिक्रियावादी शक्तिहरूको योजनाबद्ध षड्यन्त्र भएको दाबी पनि खनालले गर्नुभयो। भण्डारी र जीवराज आश्रितको हत्या षड्यन्त्रपूर्ण भएको जगजाहेर भए पनि दोषीमाथि कारबाही हुन नसकेको स्वीकार गर्दै उहाँले अहिले पनि प्रतिक्रियावादी शक्तिविरुद्धको संघर्ष जारी रहेको र त्यसका लागि वाम एकता अपरिहार्य भइसकेको बताउनुभयो।