काठमाडौं । किर्तिमानी हिमाल आरोही निर्मल पुर्जा (निम्सदाइ) को निधन भएको छ ।

प्रधानमन्त्री बालेन्द्र शाह(बालेन) ले शनिबार सामाजिक सञ्जालमार्फत पुर्जासहित ६ जना नेपालीको तस्वीरसहित श्रद्धान्जली व्यक्त गरेपछि पुर्जासहित सबै नेपाली नागरिकको मृत्यु भएको पुष्टि भएको छ ।

प्रधानमन्त्री शाहले पाकिस्तानको ८,०४७ मिटर अग्लो ब्रड पिक हिमाल आरोहणका क्रममा हिमपहिरोमा परी ज्यान गुमाएका पुर्जासहित नेपाली पर्वतारोहीहरूप्रति गहिरो श्रद्धाञ्जली व्यक्त गरेका छन्।

श्रद्धाञ्जली व्यक्त गर्दै प्रमुख शाहले साहस, अनुशासन र मानवताको सेवामा समर्पित आरोहीहरूले विश्वसामु नेपालीको पहिचानलाई उच्च बनाएको उल्लेख गरेका छन् । उनले हिमालले नेपालीलाई विश्वभर गर्व दिलाएको भन्दै जोखिमपूर्ण यात्रामा ज्यान गुमाउने आरोहीहरूको योगदान सदैव स्मरणीय रहने बताएका छन्।

शाहले ब्रड पिक आरोहणका क्रममा हिमपहिरोमा परी ज्यान गुमाएका पुरबहादुर गुरुङ (युक्त), निर्मल पुर्जा (निम्सदाइ), निमा शेर्पा, किली पेम्बा शेर्पा, ग्यालु शेर्पा र नावाङ थिन्दु शेर्पाप्रति हार्दिक श्रद्धाञ्जली अर्पण गरेका छन्।

उनले यी आरोहीहरू विश्वका सर्वोच्च शिखरहरूमा नेपालको झण्डा फहराउने साहसी व्यक्तित्व भएको उल्लेख गर्दै उनीहरूको साहस, समर्पण र योगदान नेपाली पर्वतारोहण इतिहासमा सधैँ सम्मानका साथ स्मरण गरिने बताएका छन्।

साथै, दुर्घटनामा ज्यान गुमाएका आरोहीका शोकसन्तप्त परिवार, आफन्त तथा सम्पूर्ण पर्वतारोहण समुदायप्रति उनले गहिरो समवेदना व्यक्त गरेका छन्।

ब्रड पिकमा आएको शक्तिशाली हिमपहिरोले नेपालीसहित विभिन्न देशका आरोही प्रभावित भएका छन्। दुर्घटनापछि सञ्चालन गरिएको खोजी तथा उद्धार अभियान निरन्तर जारी रहेको छ।

बिहीबार ब्रड पिकको शिखरतर्फ करिब ६ हजार ६ सय मिटर उचाइमा उक्लिरहेका बेला भएको थियो। टोलीसँग अन्तिम सम्पर्क बिहीबार बिहान भएको थियो भने सोही दिन साँझ शक्तिशाली हिमपहिरो गएको पुष्टि भएको थियो।

Originally published on abcnews.com.np.