पोखरा । पोखराको मासबारस्थित मदरल्यान्ड माध्यमिक विद्यालयले विद्यालय तहका विद्यार्थीमा नेतृत्व, कूटनीतिक सोच र अन्तर्राष्ट्रिय विषयप्रतिको बुझाइ विकास गर्ने उद्देश्यसहित आठौँ संस्करणको मोडेल युनाइटेड नेशन्स (Model UN) सम्मेलन आयोजना गरेको छ।

दुई दिनसम्म सञ्चालन हुने सम्मेलनमा कास्कीसहित ६ जिल्लाका करिब ३०० विद्यार्थी सहभागी भएका छन्। सहभागी विद्यार्थीहरूलाई आठ समूहमा विभाजन गरी विभिन्न देशको प्रतिनिधित्व गराउँदै संयुक्त राष्ट्रसंघको महासभा शैलीमा समसामयिक अन्तर्राष्ट्रिय मुद्दामाथि बहस गराइनेछ।

मदरल्यान्ड माविको आयोजना तथा नेपाल–अमेरिका अलुम्नाई नेटवर्क (नुसान) को संयोजनमा आयोजित कार्यक्रममा कक्षा १२ सम्मका विद्यार्थी सहभागी छन्।

कार्यक्रम संयोजक बामन घिमिरेले संयुक्त राष्ट्रसंघमा हुने छलफल, निर्णय प्रक्रिया र विश्वव्यापी मुद्दाबारे विद्यार्थीलाई व्यवहारिक ज्ञान दिने उद्देश्यले सम्मेलन आयोजना गरिएको बताए। उनका अनुसार यस अभ्यासले नेतृत्व क्षमता, तार्किक सोच, सहकार्य र कूटनीतिक संवादको सीप विकास गर्न सहयोग पुग्नेछ।

नुसान गण्डकी संयोजक विभूति न्यौपानेले विभिन्न मुलुकको प्रतिनिधित्व गर्दै बहसमा सहभागी हुँदा विद्यार्थीको ज्ञान र दृष्टिकोण फराकिलो बन्ने विश्वास व्यक्त गरिन्।

नुसानका सदस्य दीपेन्द्र श्रेष्ठले सानै उमेरमा संयुक्त राष्ट्रसंघको कार्यशैली बुझ्ने अवसर विद्यार्थीका लागि महत्त्वपूर्ण रहेको बताए। अर्का सदस्य सन्तोष पौडेलले युवापुस्तामा विश्व राजनीति र कूटनीतिप्रति रुचि बढाउन यस्ता अभ्यास आवश्यक रहेको उल्लेख गरे।

विद्यालयका निर्देशक डा. त्रिभुवन शर्माले सम्मेलनमार्फत विद्यार्थीले विश्वव्यापी समस्या समाधान, अन्तर्राष्ट्रिय वार्ता, सहमति निर्माण तथा कूटनीतिक सम्बन्धबारे व्यवहारिक अनुभव हासिल गर्ने बताए।

प्राचार्य डा. नारायण बरालका अनुसार विद्यालयले परीक्षामुखी शिक्षासँगै जीवनोपयोगी सीप विकासलाई प्राथमिकता दिँदै यस्ता कार्यक्रम सञ्चालन गर्दै आएको छ। प्लस टु इन्चार्ज नारायण आचार्यले पनि मोडेल यूएनजस्ता अभ्यासले विद्यार्थीमा सार्वजनिक बोलाइ, विश्लेषण क्षमता र आत्मविश्वास अभिवृद्धि गर्ने बताए।

कार्यक्रममा सहभागी पोखरा–७ का वडाध्यक्ष राममोहन आचार्यले विद्यार्थीमा बहस संस्कृति र तार्किक सोच विकास गर्न यस्ता अभ्यास प्रभावकारी हुने धारणा व्यक्त गरे।

उल्लेखनीय रूपमा, गत माघमा मदरल्यान्ड माविका ६ विद्यार्थीले अन्तर्राष्ट्रिय स्तरको संयुक्त राष्ट्रसंघको नमूना सभामा नेपालको प्रतिनिधित्व गर्ने अवसरसमेत पाएका थिए।

Originally published on abcnews.com.np.