काठमाडौं । नेपाली कांग्रेसभित्रको आन्तरिक विवाद झन् चर्किँदै जाँदा पार्टी विभाजनको संकेत देखिएको छ। संस्थापनइतर समूहले पूर्वमहामन्त्री डा. शशांक कोइरालाको नेतृत्वमा राष्ट्रिय भेला तयारी तीव्र बनाएसँगै कांग्रेसमा कोइराला परिवारको दशकौं लामो राजनीतिक विरासतसमेत संकटमा परेको छ।

संस्थापनइतर समूहले शनिबार ५५१ सदस्यीय ‘राष्ट्रिय भेला मूल आयोजक समिति’ गठन गर्दै चुनदेवीमा सम्पर्क कार्यालय सञ्चालनमा ल्याएको छ। समूहले यसलाई कांग्रेसलाई जनतासँग जोड्ने अभियानका रूपमा अघि बढाएको जनाएको छ।

पत्रकार सम्मेलनमा डा. शशांक कोइरालाले डा. शेखर कोइरालासँग निरन्तर संवाद भइरहेको र आफ्नो अभियानप्रति उनको समर्थन रहेको दाबी गरे।

विशेष महाधिवेशनपछि उत्पन्न विवाद समाधान हुन नसकेको अवस्थामा संस्थापन पक्षले १५औँ महाधिवेशनको मिति घोषणा गरिसकेको छ भने संस्थापनइतर समूहले समानान्तर राष्ट्रिय भेला र संगठन विस्तारलाई तीव्रता दिएको छ।

इतर समूहले १४औँ महाधिवेशनबाट निर्वाचित पदाधिकारी र केन्द्रीय सदस्यलाई आगामी महाधिवेशनको आयोजक समितिमा समेट्नुपर्ने तथा नवीकरण भएका क्रियाशील सदस्यलाई मान्यता दिनुपर्ने माग राख्दै आएको छ। संस्थापन पक्ष भने नयाँ मापदण्डअनुसार महाधिवेशन अघि बढाउने अडानमा छ।

दुवै पक्षबीच सहमतिको सम्भावना कमजोर बन्दै जाँदा कांग्रेस विभाजनको जोखिम बढेको राजनीतिक विश्लेषण भइरहेको छ। विवाद समाधान हुन नसके कोइराला परिवारसमेत कांग्रेसको चारतारे झण्डा र रुख चुनाव चिन्हबाहिरको राजनीतिक यात्रामा जानुपर्ने अवस्था आउन सक्ने आँकलन गरिएको छ।

Originally published on abcnews.com.np.