काठमाडौं । उपचारका लागि हङकङमा रहेका नेपाली कांग्रेसका पूर्वसभापति शेरबहादुर देउवा साउन २९ गतेअघि नै स्वदेश फर्किने भएका छन्। कांग्रेसको आन्तरिक राजनीतिक गतिविधि तीव्र भइरहेका बेला देउवा राष्ट्रिय भेलामा सहभागी हुन नेपाल फर्किन लागेका हुन्।

देउवाका स्वकीय सचिव भानु देउवा ले साउन २९ गतेअघि नै उनी नेपाल आइपुग्ने जानकारी दिए। यद्यपि, फर्किने निश्चित मिति भने अझै तय नभएको उनले बताए।

“साउन २९ गते अगाडि नै आउनुहुन्छ। तर, डेट फिक्स भइसकेको छैन,” भानु देउवाले बताएका छन्।

देउवा निकट नेताहरूले साउन २९ गते राष्ट्रिय भेला आयोजना गरेका छन्। उक्त भेलामा देउवाको उपस्थितिलाई विशेष महत्वका साथ हेरिएको छ। त्यसैले उनी निर्धारित कार्यक्रमअघि नै स्वदेश फर्किने तयारीमा रहेको स्रोतहरूले बताएका छन्।

पछिल्लो समय कांग्रेसभित्र संगठनात्मक गतिविधि र आगामी राजनीतिक रणनीतिबारे छलफल तीव्र भइरहेका बेला देउवाको स्वदेश फिर्तीलाई अर्थपूर्ण रूपमा हेरिएको छ। राष्ट्रिय भेलामा पार्टीको आन्तरिक एकता, संगठन विस्तार तथा समसामयिक राजनीतिक विषयमा छलफल हुने अपेक्षा गरिएको छ।

हङकङमा स्वास्थ्य उपचार गराइरहेका देउवाको स्वास्थ्य अवस्था सुधारोन्मुख रहेको निकट स्रोतहरूले जनाएका छन्। उनी स्वदेश फर्किएलगत्तै पार्टीका शीर्ष नेताहरूसँग परामर्श र राजनीतिक भेटघाटलाई तीव्रता दिने तयारीमा रहेको बताइएको छ।

Originally published on abcnews.com.np.