काठमाडौं । नेपाल सरकारले राष्ट्रसेवक कर्मचारीहरूको नयाँ तलबमान र सुविधा स्वीकृत गर्दै साउन १ गतेदेखि लागू गरेको छ। अर्थ मन्त्रालयले परिपत्र जारी गर्दै मन्त्रिपरिषद्को साउन ६ गतेको निर्णयअनुसार निजामती कर्मचारी, नेपाली सेना, नेपाल प्रहरी, सशस्त्र प्रहरी, स्वास्थ्य सेवा, संसद् सेवा, सामुदायिक विद्यालयका शिक्षक तथा प्रदेश र स्थानीय तहका कर्मचारीका लागि नयाँ तलबमान कार्यान्वयनमा आएको जनाएको हो।

नयाँ व्यवस्थाअनुसार मुख्य सचिव र नेपाली सेनाका प्रधानसेनापतिको मासिक तलब ९० हजार ५ सय ९४ रुपैयाँ पुगेको छ भने सचिव, रथी, नेपाल प्रहरीका महानिरीक्षक र सशस्त्र प्रहरी महानिरीक्षकको मासिक तलब ८४ हजार ५ सय ७६ रुपैयाँ कायम गरिएको छ। तल्लो तहका कार्यालय सहयोगी प्रथम स्तरको मासिक तलब २८ हजार ९ सय ८४ रुपैयाँ तोकिएको छ।

सरकारले नयाँ तलबमानसँगै सबै सम्बन्धित कर्मचारीलाई एक दिनको तलब बराबरको ग्रेड रकम र वृद्धि भएको तलबमानको १० प्रतिशत मासिक प्रोत्साहन भत्ता उपलब्ध गराउने निर्णय पनि गरेको छ। साथै, निवृत्तभरण अर्थात् पेन्सन प्राप्त गर्ने कर्मचारीको पेन्सनमा पनि १० प्रतिशत वृद्धि गरिएको अर्थ मन्त्रालयले जनाएको छ।

Originally published on abcnews.com.np.