काठमाडौं । जनता समाजवादी पार्टी (जसपा) नेपालसहित आठ राजनीतिक दलले नयाँ राजनीतिक सहकार्यका रूपमा ‘अग्रगामी मोर्चा’ घोषणा गरेका छन्। संघीय लोकतान्त्रिक गणतन्त्र, पहिचान, समावेशिता र संविधानको पूर्ण कार्यान्वयनलाई साझा एजेन्डा बनाउँदै मोर्चा गठन गरिएको हो।

शनिबार काठमाडौंको थापागाउँस्थित एक ब्यांक्वेटमा आयोजित कार्यक्रममा आठ दलका शीर्ष नेताहरूले संयुक्त रूपमा मोर्चाको घोषणा गर्दै २८ बुँदे अवधारणापत्र सार्वजनिक गरेका छन्।

यी दल भए मोर्चामा

मोर्चाको अवधारणापत्रमा निम्न दलका शीर्ष नेताहरूले हस्ताक्षर गरेका छन्–

• जनता समाजवादी पार्टी (नेपाल) का अध्यक्ष उपेन्द्र यादव
• जनमत पार्टीका अध्यक्ष डा. चन्द्रकान्त (सीके) राउत
• आम जनता पार्टीका अध्यक्ष प्रभु साह
• नागरिक उन्मुक्ति पार्टीका संरक्षक रेशम चौधरी
• प्रगतिशील लोकतान्त्रिक पार्टीका अध्यक्ष सन्तोष परियार
• नेपाल संघीय समाजवादी पार्टीका अध्यक्ष रिजवान अन्सारी
• बहुजन एकता पार्टीका अध्यक्ष डा. हरिनन्दन कुमार रञ्जन
• खम्बुवान राष्ट्रिय मोर्चाका अध्यक्ष रामकुमार राई

सहमतिलाई प्राथमिकता, आवश्यक परे लोकतान्त्रिक निर्णय

मोर्चाको संरचनाअनुसार नेतृत्व निश्चित अवधिका लागि रहने व्यवस्था गरिएको छ। निर्णय प्रक्रियामा सकेसम्म सर्वसम्मति कायम गर्ने प्रयास गरिनेछ भने सहमति हुन नसके लोकतान्त्रिक विधिबाट निर्णय लिने प्रावधान राखिएको छ।

मोर्चामा आबद्ध सबै दलले सामूहिक निर्णयको सम्मान गर्नुपर्ने र मोर्चाको साझा निर्णयविपरीत सार्वजनिक गतिविधि नगर्ने व्यवस्था पनि अवधारणापत्रमा उल्लेख गरिएको छ।

वैकल्पिक राजनीतिक ध्रुवीकरणको संकेत

आठ दलको यो सहकार्यलाई संघीयता, पहिचान, समावेशी प्रतिनिधित्व र संविधान कार्यान्वयनका मुद्दामा समान धारणा राख्ने दलहरूबीचको नयाँ राजनीतिक ध्रुवीकरणका रूपमा हेरिएको छ। विशेषगरी मधेस, आदिवासी–जनजाति, थारू, दलित तथा पहिचानका मुद्दालाई केन्द्रमा राख्दै साझा राजनीतिक अभियान सञ्चालन गर्ने उद्देश्य मोर्चाले लिएको जनाइएको छ।

राजनीतिक विश्लेषकहरूका अनुसार संसद्भित्र र बाहिर छरिएर रहेका क्षेत्रीय तथा पहिचानमुखी शक्तिहरूलाई एउटै राजनीतिक प्लेटफर्ममा ल्याउने प्रयासस्वरूप यो मोर्चा गठन भएको हो। आगामी राजनीतिक घटनाक्रम, निर्वाचन तथा राष्ट्रिय मुद्दामा साझा धारणा निर्माण गर्न पनि यसले भूमिका खेल्ने अपेक्षा गरिएको छ।

मोर्चाले सार्वजनिक गरेको २८ बुँदे अवधारणापत्र लाई आगामी दिनमा साझा राजनीतिक कार्यक्रम र आन्दोलनको आधार दस्तावेजका रूपमा अघि बढाइने जनाइएको छ।

Originally published on abcnews.com.np.