काठमाडौं, २९ चैत-शनिवार अर्थात भोली विक्रम संवत २०७५ शुरु हुँदैछ । बिदा हुँदै गरेको वर्ष २०७४ मा देशमा केही बिर्सनलायक घटना भए । केही दैवी प्रकोपका कारण र केही दुर्घटनाका कारण ।

विमान दुर्घटना

२०७४ सालको सबैभन्दा बिर्सनलायक घटना फागुन २८ गते काठमाडौंको त्रिभुवन विमानस्थलमा भएको युएस बंगला एयरलाइन्सको विमान दुर्घटना हो । दुर्घटनामा चालक दलका ४ सहित विमानमा सवार ५१ जनाको निधन भयो । ६७ जना यात्रु रहेको विमानबाट १७ जनाको जीवितै उद्धार गरिएको भए पनि दुई जनाको उपचारका क्रममा निधन भएको थियो ।

विमानमा बंगलादेशमा एमबीबीएस पढ्दै गरेका विद्यार्थी थिए । एकमात्र अन्तर्राष्ट्रिय विमानस्थलमा भएको दुर्घटनाका कारण अन्तर्राष्ट्रिय क्षेत्रमा नेपाली आकाश र विमानस्थलबारे नकारात्मक सन्देश गयो । युएस बंगलाले काठमाडौं उडान स्थगित गर्‍यो ।

गएको जेठ १७ गते नेपाली सेनाको जहाज बाजुरामा दुर्घटना भयो । सुर्खेतबाट हुम्लास्थित सिमकोटका लागि उडेको नेपाली सेनाको कार्गो विमान बाजुराको कोल्टी विमानस्थलमा दुर्घटना हुँदा महासेनानी क्याप्टेन कैलाश गुरुङको मृत्यु भयो । विमानकी सहचालिका र स्टेवार्ड घाइते भए ।

सोलुखुम्बुको लुक्ला विमानस्थलमा जेठ १३ गते गोमा एयरको कार्गो विमान दुर्घटना विमानका चालकको निधन भयो । चालका पारस राईको उपचारका क्रममा निधन भएको हो । दुर्घटनामा सहचालक श्रीजन मानन्धर र परिचारिका प्रज्ञा महर्जन घाइते भए ।

ठूला बस दुर्घटना

सप्तरीबाट काठमाडौं आउँदै गरेको बस कात्तिक ११ गते धादिङको गजुरी गाउँपालिका– ५ स्थित त्रिशूली नदीमा खस्दा ३० जनाको मृत्यु भयो । दुर्घटनामा सप्तरीको तिलाठी कोइलाडी गाउँपालिका–१ तिलाठीका एकै परिवारका पाँच जनाको निधन भयो । दीपावली र छठ पर्व सम्पन्न गरी काठमाडौं हिँडेका सञ्जितकुमार झासहित परिवारका पाँचजनाको मृत्यु भएको थियो ।

कालिकोटको जितेबाट कञ्चनपुरको महेन्द्रतगरतार्फ जाँदै गरेको बस असार १ गते दैलेखको आठबीस नगरपालिका–४ भेलतडास्थित नैनदेवल मन्दिर नजिक दुर्घटना हुँदा ११ जनाको मृत्यु भयो । ना४ख २९९८ नम्बरको बस दुर्घटना हुँदा २१ जना यात्रु घाइते भएका थिए ।

काठमाडौंबाट नुवाकोटको खरानीटार जाँदै गरेको बस भदौ २४ मा शिवपुरी गाउँपालिका–७ स्थित सुनखानीको ठानाभञ्ज्याङमा दुर्घटना हुँदा सात जनाको मृत्यु भयो ।

आगलागी

गएको असार ४ गते काठमाडौंको गोकर्णेश्वर नगरपालिका–१ बीपी चोकस्थित गाई फार्ममा आगलागी हुँदा ४६ गाई जलेर मरे । स्थानीय बाबुराम कार्कीले सञ्चालन गरेको ओम कृषि फार्ममा रहेका १ सय २२ गाईमध्ये केही जलेर घाइते भए ।

असोज १५ गते काठमाडौंको बल्खु कुलेश्वरस्थित फलफूल बजार अगाडि सुकुम्बासी बस्तीमा भएको भीषण आगलागीमा ४० घर नष्ट भए । मानबहादुर विकको घरमा दियो बाल्दाबाल्दै शुरु भएको आगलागीमा करीब १५ वटा ग्यास सिलिण्डर पनि पड्केका थिए ।

गएको पुस ५ गते वीरगञ्जस्थित सुपर ग्यास उद्योगमा भीषण आगलागी भयो । वीरगञ्ज महानगरपालिका– २२ स्थित पटेलनगरमा रहेको उद्योगको आगलागी नियन्त्रणका लागि सेना र सशस्त्र प्रहरीलाई हम्मेहम्मे पर्‍यो ।

बाढीपहिरो

देशका विभिन्न स्थानमा आएको बाढी, पहिरो र डुबानका कारण १ सय ११ जनाको मृत्यु भयो । बाढीका कारणमध्य तराईका जिल्ला अस्तव्यस्त बने । दशौंहजार घरहरू डुबानमा परे र तराईमा भयाभह स्थिति सिर्जना भयो ।

जीप दुर्घटना

गएको पुस ३० गते संखुवासभामा जीप दुर्घटना हुँदा मकालु गाउँपालिका अध्यक्षसहित पाँच जनाको मृत्यु भयो । संखुवासभाको मकालु– ३ समाटार भन्ने स्थानमा जीप दुर्घटना हुँदा मकालु गाउँपालिकाका अध्यक्ष खड्गबहादुर कटवालको निधन भयो ।

माघ २७ गते पृथ्वी राजमार्गअन्तर्गत धादिङको बेनिघाट रोलाङबाट त्रिशूली नदीमा जीप खस्दा नेपाल सरकारका बहालवाला सचिव रामानन्दप्रसाद यादवको मृत्यु भयो ।

गएको असोज १० गते काभ्रेको रोशी गाउँपालिका वडा नम्बर ३ शिखरआमबोटेमा बोलेरो जिप दुर्घटना हुँदा ६ जनाको मृत्यु भयो । बनेपाबाट डाँडापारी गोकुले जाँदै गरेको बा १४ च ९५५६ नम्बरको बोलेरो दुर्घटनामा ५ जना महिला र १ जना पुरुषको मृत्यु भयो ।

यी त प्रतिनिधिमूलक घटना हुन्, वर्षभरीमा दर्जनौँ सानाठूला दुर्घटना भए ।