काठमाडौं । नेपाल दूरसञ्चार प्राधिकरणले नेपाल टेलिकम र एनसेललाई प्रमुख सहरबाट ५जी सेवा सुरु गर्ने गरी चरणबद्ध कार्ययोजना पेश गर्न निर्देशन दिएको छ।

प्राधिकरणले ४जी सेवाको पहुँच र गुणस्तर सुधारसँगै ५जी विस्तारको तयारी अघि बढाउन सेवा प्रदायकलाई निर्देशन दिएको हो। सेवा गुणस्तर, नेटवर्क विश्वसनीयता, डेटा गति, उपभोक्ता गुनासो व्यवस्थापन र साइबर सुरक्षासम्बन्धी ८ बुँदे निर्देशनसमेत जारी गरिएको छ।

तर ५जी सञ्चालनका लागि आवश्यक ठूलो लगानी र त्यसको प्रतिफल सुनिश्चित नहुँदा सेवा प्रदायक तत्काल लगानी गर्न उत्साहित देखिएका छैनन्। नेपालमा ५जी पूर्वाधार निर्माणका लागि करिब ७० अर्ब रुपैयाँ लगानी आवश्यक पर्ने अनुमान गरिएको छ।

नेपाल टेलिकमले करिब तीन वर्षअघि ५जीको परीक्षण गरिसकेको भए पनि व्यावसायिक रूपमा सञ्चालन गर्न भने पूर्वाधार लागत र प्रतिफलको अनिश्चिततालाई मुख्य चुनौतीका रूपमा लिएको छ। एनसेलको इजाजतपत्रको अवधि तथा भविष्यमा सरकारी स्वामित्वमा जाने व्यवस्थाले पनि थप पूर्वाधार लगानीमा अन्योल सिर्जना गरेको छ।

प्राधिकरणले सेवा प्रदायकलाई नेटवर्कको अवस्था, सेवा अवरोध, डेटा गति र ग्राहक सन्तुष्टिसम्बन्धी विवरण नियमित रूपमा बुझाउन निर्देशन दिएको छ। ग्राहक सहायता प्रणालीमा एआईलगायत प्रविधिको प्रयोग गर्न र २४सै घण्टा गुनासो सुनुवाइको व्यवस्था गर्नसमेत भनिएको छ।

त्यस्तै, सेवा नपुगेका क्षेत्रमा नेटवर्क विस्तार, फ्रिक्वेन्सीको प्रभावकारी उपयोग र दूरसञ्चार पूर्वाधार साझा प्रयोगमार्फत लागत घटाउन प्राधिकरणले जोड दिएको छ।

प्राधिकरणका अनुसार निर्देशन कार्यान्वयन भएपछि ४जी सेवाको गुणस्तर सुधारसँगै नेपालमा ५जी तथा नयाँ पुस्ताको दूरसञ्चार प्रविधि विस्तारको प्रक्रिया अघि बढ्ने अपेक्षा गरिएको छ।

Originally published on abcnews.com.np.