काठमाडौँ । पछिल्ला चार दिनमा लगातार उकालो लागेको सुनको मूल्यमा आज सामान्य गिरावट आएको छ। नेपाल सुनचाँदी व्यवसायी महासंघका अनुसार आज सुनको मूल्य तोलामा २०० रुपैयाँले घटेर ३ लाख १ हजार ५०० रुपैयाँ कायम भएको छ।

यसअघि हिजो सुनको मूल्य एकैदिन ४ हजार ८ सय रुपैयाँले बढेर ३ लाख १ हजार ७ सय रुपैयाँ पुगेको थियो। त्यसअघि शुक्रबार सुन तोलामा ९ सय रुपैयाँ, बिहीबार ८ हजार रुपैयाँ र बुधबार ४ हजार २ सय रुपैयाँले बढेको थियो।

यसरी बुधबारदेखि आइतबारसम्मको चार दिनमा सुनको मूल्य तोलामा कुल १७ हजार ८ सय रुपैयाँले बढेको थियो। लगातारको तीव्र वृद्धिपछि आज भने बजारमा सामान्य करेक्सन देखिएको हो।

चाँदीको मूल्य भने बढ्यो

सुनको मूल्य घटेको दिन चाँदी भने महँगिएको छ।

महासंघका अनुसार आज चाँदीको मूल्य तोलामा २५ रुपैयाँले बढेर ४ हजार ६ सय ७० रुपैयाँ पुगेको छ।

अघिल्लो दिनको तुलनामा चाँदीको मूल्यमा सामान्य वृद्धि भए पनि पछिल्लो समय यसको मूल्य उच्च तहमा नै रहेको छ।

सुनको मूल्य अझै तीन लाखभन्दा माथि

आज केही घटे पनि नेपाली बजारमा सुनको मूल्य अझै तोलाको तीन लाख रुपैयाँभन्दा माथि कायम छ।

पछिल्लो समय सुनको मूल्यमा देखिएको तीव्र उतारचढावले बजारमा लगानीकर्ता, व्यवसायी तथा उपभोक्ताको चासो बढाएको छ। केही दिनमै हजारौँ रुपैयाँको फरक देखिन थालेपछि विवाह, सामाजिक समारोह तथा अन्य प्रयोजनका लागि सुन खरिद गर्ने उपभोक्ताले मूल्य घट्ने वा बढ्ने अवस्थालाई समेत ध्यान दिन थालेका छन्।

कहिले पुगेको थियो अहिलेसम्मकै उच्च मूल्य ?

नेपाली बजारमा सुनको मूल्य अहिलेसम्मकै उच्च बिन्दुमा गएको माघ १५ गते पुगेको थियो।

त्यस दिन सुनको मूल्य एकैदिन २० हजार ५ सय रुपैयाँले बढेर तोलाको ३ लाख ३९ हजार ३ सय रुपैयाँ पुगेको थियो। उक्त मूल्य नेपाली बजारमा हालसम्मकै उच्च सुन मूल्य हो।

आजको मूल्य भने उक्त ऐतिहासिक उच्च मूल्यभन्दा ३७ हजार ८ सय रुपैयाँ कम छ।

चाँदीको उच्चतम मूल्य पनि माघमै

चाँदीको मूल्य पनि यसअघि ऐतिहासिक उच्च बिन्दुमा पुगेको थियो।

गएको माघ १५ गते चाँदीको मूल्य तोलाको ७ हजार ५ सय ५ रुपैयाँ पुगेको थियो। यो नेपाली बजारमा चाँदीको हालसम्मकै उच्च मूल्य हो।

त्यसको केही दिनपछि, माघ १८ गते चाँदीको मूल्य एकैदिन १ हजार ५ सय ६५ रुपैयाँले घटेको थियो। उक्त गिरावट पनि नेपाली बजारमा चाँदीको मूल्यमा आएको अहिलेसम्मकै ठूलो एकदिने गिरावटका रूपमा उल्लेख गरिएको छ।

हाल चाँदीको मूल्य ४ हजार ६ सय ७० रुपैयाँ कायम रहेकाले यसको उच्चतम मूल्यको तुलनामा अझै २ हजार ८ सय ३५ रुपैयाँ कम छ।

पछिल्लो मूल्य अवस्था

सुनमा आज सामान्य गिरावट आए पनि मूल्य तीन लाख रुपैयाँभन्दा माथि रहनुले बजार अझै उच्च मूल्यको चरणमा रहेको देखाउँछ। आगामी दिनमा अन्तर्राष्ट्रिय बजारको अवस्था तथा त्यसको प्रभावअनुसार नेपाली बजारमा सुनचाँदीको मूल्यमा थप उतारचढाव आउन सक्नेछ।

Originally published on abcnews.com.np.