काठमाडौं । साउन महिनाका चार सोमबारदेखि पशुपतिनाथ क्षेत्रमा सञ्चालन हुँदै आएको ‘सफा गरौँ’ अभियान सम्पन्न भएको छ। अन्तिम सोमबार पशुपतिनाथ क्षेत्रमा फोहोर व्यवस्थापन तथा सरसफाइ गर्दै अभियानको समापन गरिएको हो।

द कोका–कोला फाउन्डेसनको सहयोग तथा क्रिएसन नेपालको आयोजनामा सञ्चालित अभियानको उद्देश्य पशुपतिनाथ क्षेत्रको सरसफाइसँगै धार्मिक तथा सांस्कृतिक सम्पदाको संरक्षण र स्वच्छताबारे जनचेतना अभिवृद्धि गर्नु रहेको आयोजकले जनाएको छ।

समापन कार्यक्रममा द कोका–कोला फाउन्डेसनका आदित्यले क्रिएसन नेपालसँगको सहकार्यमा प्रभावकारी काम भइरहेको बताउँदै आगामी दिनमा अभियानलाई थप विस्तार गर्ने प्रतिबद्धता व्यक्त गरे।

क्रिएसन नेपालकी अध्यक्ष अरुणा कार्कीले विभिन्न चुनौतीका बाबजुद अभियानलाई सफल बनाउन सहयोग गर्ने सबै सहभागीलाई धन्यवाद दिइन्। उनले ‘सफा गरौँ’लाई एकपटकको कार्यक्रम नभई निरन्तर नागरिक अभियानका रूपमा अघि बढाउनुपर्नेमा जोड दिइन्।

क्रिएसन नेपालकी सचिव रोशना सुवेदीले धार्मिक तथा सांस्कृतिक सम्पदाको संरक्षण र सरसफाइ सबै नागरिकको साझा दायित्व भएको बताइन्। आस्थाका केन्द्र तथा सांस्कृतिक धरोहरलाई स्वच्छ र सांस्कृतिक गरिमा कायम हुने अवस्थामा राख्नु हरेक नागरिकको जिम्मेवारी भएको उनको भनाइ छ।

कार्यक्रम निर्देशक सुजाता कोइरालाका अनुसार अभियानअन्तर्गत चार सोमबारसम्म ५ सयभन्दा बढी स्वयंसेवक परिचालन गरिएको थियो। विभिन्न कलेजका सयौँ विद्यार्थी तथा प्रत्येक सोमबार दुई दर्जनभन्दा बढी सफाइकर्मीसमेत अभियानमा सहभागी भएका थिए।

अभियानको समापन अवसरमा चारै सोमबार निरन्तर सहभागी भएका विभिन्न कलेजका विद्यार्थी, स्वयंसेवक तथा सफाइकर्मीलाई प्रशंसापत्र प्रदान गरी सम्मान गरिएको थियो।

आयोजकका अनुसार धार्मिक, पर्यटकीय तथा सांस्कृतिक महत्व बोकेका ऐतिहासिक तथा विश्व सम्पदा क्षेत्रमा सरसफाइलाई प्राथमिकता दिँदै ‘सफा गरौँ’ अभियानलाई आगामी दिनमा देशव्यापी रूपमा विस्तार गरिनेछ।

Originally published on abcnews.com.np.