काठमाडौं । पाकिस्तानको ब्रोड पिक शिखरमा भएको दुःखद घटनामा ज्यान गुमाएका तीन नेपाली पर्वतारोहीको शव मंगलबार नेपाल ल्याइने भएको छ।

ब्रोड पिकमा ज्यान गुमाएका किलु शेर्पा, निमा शेर्पा र ग्यालु शेर्पाको पार्थिव शरीर कतार एयरवेजमार्फत नेपाल ल्याउन लागिएको हो।

राष्ट्रिय स्वतन्त्र पार्टीका सांसद मिङ्मा डेभिड शेर्पाले सामाजिक सञ्जालमार्फत दिएको जानकारीअनुसार उनीहरूको शव कतार एयरवेजको क्यूआर–०६४६ उडानबाट दोहाहुँदै काठमाडौं ल्याइनेछ। उक्त विमान मंगलबार अपराह्न ४ः४५ बजे त्रिभुवन अन्तर्राष्ट्रिय विमानस्थलमा अवतरण गर्नेजनाइएको छ।

विमानस्थलमा आवश्यक कानुनी तथा प्रशासनिक प्रक्रिया पूरा गरेपछि तीनै जना पर्वतारोहीको पार्थिव शरीरलाई अन्तिम श्रद्धाञ्जलीका लागि नेपाल पर्वतारोहण संघको कार्यालयमा लगिने तयारी गरिएको छ।

ब्रोड पिकमा भएको दुर्घटनामा तीन नेपाली पर्वतारोहीको निधन भएपछि उनीहरूको शव नेपाल ल्याउने प्रक्रिया अघि बढाइएको हो। शव काठमाडौं आइपुगेपछि श्रद्धाञ्जली तथा अन्तिम संस्कारसम्बन्धी प्रक्रिया परिवार र सम्बन्धित निकायको समन्वयमा अघि बढाइनेछ।

Originally published on abcnews.com.np.