काठमाडौं । मनसुनको न्यूनचापीय रेखा सरदर स्थान आसपास रहेकाले नेपालमा वर्षाको क्रम घटेको जल तथा मौसम विज्ञान विभागअन्तर्गतको मौसम पूर्वानुमान महाशाखाले जनाएको छ।

महाशाखाले मंगलबार बिहान जारी गरेको मौसम पूर्वानुमानअनुसार दिउँसो हिमाली तथा पहाडी भूभागमा साधारणतया बादल लाग्नेछ भने तराई क्षेत्रमा आंशिक बदली रहनेछ।

हिमाली भूभागका थोरै स्थानमा मेघगर्जन र चट्याङसहित मध्यमसम्म वर्षा तथा हिमपातको सम्भावना छ। पहाडी भूभागका केही स्थानमा पनि मेघगर्जन र चट्याङसहित मध्यमसम्म वर्षा हुन सक्नेछ। तराईका एक–दुई स्थानमा समेत मध्यमसम्म वर्षाको सम्भावना रहेको महाशाखाले जनाएको छ।

आज राति पनि हिमाली तथा पहाडी क्षेत्रमा साधारणतया बदली रहनेछ भने तराईमा आंशिक बदली रहने अनुमान छ। हिमाली र पहाडी भूभागका थोरै स्थान तथा तराईका एक–दुई स्थानमा मध्यमसम्म वर्षा वा हिमपात हुन सक्नेछ।

काठमाडौंमा साँझपख वर्षाको सम्भावना

काठमाडौं उपत्यकामा भने मंगलबार साँझपख वर्षाको सम्भावना बढी रहेको मौसमविद्ले बताएका छन्।

मौसमविद् डेभिड ढकालका अनुसार दिनभर उपत्यकाको मौसम घाम र बादलबीच रहनेछ। दिउँसो २–३ बजेपछि वर्षाको सम्भावना बढ्दै जाने र साँझ तथा राति पानी पर्ने सम्भावना तुलनात्मक रूपमा बढी रहेको उनले बताए।

यद्यपि, उपत्यकामा ठूलो वर्षाको सम्भावना भने नरहेको मौसमविद् ढकालले बताएका छन्। उनका अनुसार मध्यमसम्म वर्षा हुन सक्ने भए पनि उपत्यकाका सबै क्षेत्रमा एकैपटक पानी पर्ने सम्भावना छैन।

कस्तो वर्षालाई के भनिन्छ?

मौसमविद्का अनुसार २४ घण्टामा १० मिलिमिटरभन्दा कम वर्षालाई हल्का वर्षा मानिन्छ। १० देखि ५० मिलिमिटरसम्म वर्षा भए मध्यम, ५० देखि १०० मिलिमिटरसम्म भए भारी, १०० देखि २०० मिलिमिटरसम्म भए धेरै भारी र २०० मिलिमिटरभन्दा बढी वर्षा भए अति भारी वर्षा मानिन्छ।

‘एक–दुई स्थान’ र ‘थोरै स्थान’को अर्थ

मौसम पूर्वानुमानमा प्रयोग हुने ‘एक–दुई स्थान’ भन्नाले सम्बन्धित भूभागको १० प्रतिशतभन्दा कम क्षेत्रमा वर्षा हुने सम्भावना जनाउँछ।

त्यस्तै, १० देखि ३० प्रतिशत भूभागमा वर्षाको सम्भावना हुँदा ‘थोरै स्थान’, ३० देखि ५० प्रतिशतमा ‘केही स्थान’, ५० देखि ८० प्रतिशतमा ‘धेरै स्थान’ र ८० प्रतिशतभन्दा बढी भूभागमा वर्षाको सम्भावना हुँदा **‘अधिकांश स्थान’**मा वर्षा हुने भनिन्छ।

Originally published on abcnews.com.np.