काठमाडौं । व्यावसायिक बीमा बजारमा बढ्दो क्षमता र तीव्र प्रतिस्पर्धाका कारण खरिदकर्ताले लाभ लिइरहेका छन्। तर, भूराजनीतिक तनाव, बढ्दो दाबी र विस्तृत जोखिम मूल्यांकनका कारण बजारका केही क्षेत्रमा दबाब बढेको एओनको सन् २०२६ दोस्रो त्रैमासिक ग्लोबल बीमा बजार अन्तर्दृष्टि प्रतिवेदनले जनाएको छ।

प्रतिवेदनअनुसार धेरै प्रमुख व्यापारिक लाइनमा बीमा दर घट्नुका साथै कभरेज र सर्तहरू पनि खरिदकर्ताका लागि अनुकूल बनेका छन्। प्रविधिको प्रयोगले बीमा कम्पनीलाई जोखिमको थप विस्तृत मूल्यांकन गर्न सहयोग पुर्‍याइरहेको छ।

मध्यपूर्वको द्वन्द्वका कारण समुद्री, उड्डयन, आतंकवाद, राजनीतिक हिंसा, ऊर्जा र व्यापारसँग सम्बन्धित जोखिममा बीमा कम्पनीले थप कडाइ गरेका छन्। एओनका ग्लोबल कमर्सियल रिस्क सोलुसन्सका सीईओ क्रिश्चियन हफम्यानका अनुसार समुद्री हल तथा युद्ध, समुद्री पीएन्डआई, उड्डयन, आतंकवाद र राजनीतिक हिंसासम्बन्धी बीमामा यसको प्रभाव बढी देखिएको छ।

त्यस्तै, आपूर्ति शृंखलामा अवरोध, ऊर्जा मूल्यमा उतारचढाव र व्यापार अवरोधका कारण व्यवसायमा जोखिम बढेको प्रतिवेदनमा उल्लेख छ। श्रम, यातायात तथा मर्मत लागत वृद्धिले सम्पत्ति दाबीको रकम बढाएको छ भने कानुनी, चिकित्सा र सम्झौता लागतका कारण दायित्वसम्बन्धी दाबी पनि बढिरहेका छन्।

यी दबाब व्यावसायिक अटोमोबाइल र अमेरिकी दुर्घटना बीमामा विशेष रूपमा देखिएको एओनले जनाएको छ। समग्रमा भने वर्तमान बजार अवस्थाले व्यवसायलाई बीमा कार्यक्रम थप बलियो बनाउने र जोखिम हस्तान्तरण रणनीतिको पुनरावलोकन गर्ने अवसर दिएको प्रतिवेदनको निष्कर्ष छ।

Originally published on abcnews.com.np.