काठमाडौं । माउण्टेन इनर्जी नेपाल लिमिटेडले आर्थिक वर्ष २०८२/८३ मा ७९ करोड ७० लाख ४३ हजार रुपैयाँ खुद नाफा कमाएको छ। यो अघिल्लो आर्थिक वर्षको ६१ करोड ७४ लाख रुपैयाँको तुलनामा २९.०८ प्रतिशतले बढी हो।

कम्पनीले विद्युत बिक्रीबाट १ अर्ब ५३ करोड ३५ लाख रुपैयाँ आम्दानी गरेको छ, जुन अघिल्लो वर्षको १ अर्ब ३० करोड रुपैयाँभन्दा १७.३१ प्रतिशत बढी हो। विद्युत बिक्री आम्दानीमा वृद्धि, बीमा दाबीबाट प्राप्त ९ लाख रुपैयाँ तथा ब्याज खर्चमा आएको कमीले नाफा बढाउन सहयोग गरेको कम्पनीले जनाएको छ।

कम्पनीको चुक्ता पुँजी ३ अर्ब १२ करोड ३२ लाख रुपैयाँ र रिजर्भ १ अर्ब ५८ करोड रुपैयाँ रहेको छ। यस अवधिमा प्रतिसेयर आम्दानी २३.७२ रुपैयाँबाट बढेर २५.५२ रुपैयाँ पुगेको छ भने प्रतिसेयर नेटवर्थ १५०.७८ रुपैयाँ रहेको छ।

कम्पनीले मनाङमा निर्माण गर्ने ६५ मेगावाट क्षमताको दूधखोला जलविद्युत् आयोजनाका लागि वित्तीय व्यवस्थापन गरिसकेको छ। आयोजना निर्माणका लागि आवश्यक रकम जुटाउन कम्पनीले बोनस सेयरलाई प्राथमिकता दिन सक्ने बताइएको छ। कम्पनीले हाल ४२ मेगावाटको मिस्ट्रीखोला र ५ मेगावाटको ताँदीखोला जलविद्युत् आयोजनाबाट नियमित विद्युत् उत्पादन गरिरहेको छ।

Originally published on abcnews.com.np.