काठमाडौं । नेपालमा ह्युन्डाई गाडीको आधिकारिक वितरक लक्ष्मी इन्टरकन्टिनेन्टल प्रालिले नयाँ ‘मेड इन नेपाल भेन्यु’ र ‘भेन्यु एन लाइन’ सार्वजनिक गरेको छ।

कम्पनीले कम्प्याक्ट एसयूभी सेग्मेन्टमा नयाँ अनुभव प्रदान गर्ने उद्देश्यले यी दुई मोडल सार्वजनिक गरेको जनाएको छ।

मेड इन नेपाल भेन्यु आकर्षक डिजाइन, आधुनिक प्रविधि, प्रदर्शन र सुरक्षा विशेषतासहित बजारमा आएको छ। गाडीमा ट्विन हर्न एलईडी डीआरएल, होराइजन एलईडी रियर ल्याम्प, पावर्ड टिल्ट एन्ड स्लाइड सनरुफ, १०.२५ इन्चको इन्फोटेनमेन्ट डिस्प्ले र ६ वटा एयरब्यागलगायत सुविधा छन्।

यो गाडी १.२ लिटर पेट्रोल र १.० लिटर टर्बो पेट्रोल इन्जिन विकल्पमा उपलब्ध हुनेछ।

कम्पनीका अनुसार मेड इन नेपाल भेन्युमा तीन भेरियन्ट उपलब्ध छन्। एचएक्स २ (१,१९७ सीसी पेट्रोल), एचएक्स ५ प्लस (१,१९७ सीसी पेट्रोल) र एचएक्स ५ डीसीटी (९९८ सीसी पेट्रोल) भेरियन्ट बजारमा ल्याइएको हो।

यसको सुरुवाती मूल्य ४८ लाख ९६ हजार रुपैयाँ तोकिएको छ।

त्यस्तै, भेन्यु एन लाइन लाई स्पोर्टी र विशिष्ट शैलीमा प्रस्तुत गरिएको छ। यसमा एन–ब्रान्डेड सिट, एन–ब्रान्डेड एलोय ह्वील, सिग्नेचर रेड हाइलाइटसहितको बडी कलर क्लाडिङ तथा अन्य एन लाइन स्टाइलिङ विशेषता समावेश छन्।

कम्पनीले भेन्यु एन लाइनमा प्रविधि, आराम र व्यावहारिकतालाई कायम राख्दै थप गतिशील ड्राइभिङ अनुभव प्रदान गर्ने दाबी गरेको छ।

भेन्यु एन लाइनको सुरुवाती मूल्य ६७ लाख ९६ हजार रुपैयाँ तोकिएको छ।

Originally published on abcnews.com.np.