मुगु । जिल्ला सदरमुकाम गमगढी बजारमा नौ दिनदेखि नियमित खानेपानी आपूर्ति हुन नसक्दा स्थानीयवासी समस्यामा परेका छन्। पानी आपूर्ति अवरुद्ध भएपछि बजारवासी, विद्यार्थी, कर्मचारी, व्यवसायी तथा सेवाग्राहीलाई दैनिक उपभोगका लागि आवश्यक पानी जुटाउन कठिन भएको छ।

मुगुम कार्मारोङ गाउँपालिका–९ की बिजकला बुढाले लगातार नौ दिनसम्म धारामा पानी नआउँदा बालबालिकालाई शौचालय प्रयोग गर्न तथा व्यक्तिगत सरसफाइ गर्नसमेत समस्या भएको बताइन्। सदरमुकाममै लामो समयदेखि खानेपानीको समस्या हुँदा पनि प्रभावकारी पहल हुन नसकेको उनको गुनासो छ।

छायानाथ रारा नगरपालिका–९ की कक्षा ६ मा अध्ययनरत विजय रोकायाले पानीको अभावमा टाढाबाट पानी बोकेर ल्याउनुपर्ने बाध्यता रहेको बताइन्। उनले गमगढी खानेपानी तथा सरसफाइ उपभोक्ता समितिले मर्मत तथा व्यवस्थापनको काम प्रभावकारी रूपमा गर्न नसकेको आरोप लगाइन्।

पहिरोले पाइप बगाएपछि समस्या

गमगढी खानेपानी तथा सरसफाइ उपभोक्ता समितिका अध्यक्ष गोर्खबहादुर मल्लका अनुसार ताल्चामा गएको सुख्खा पहिरोले करिब ५० मिटर खानेपानीको पाइप बगाएपछि आपूर्ति प्रभावित भएको हो।

पाइप मर्मतमा समय लागेकाले सदरमुकाममा खानेपानीको समस्या भएको उनले बताए। अहिले मर्मतको काम भइरहेको समितिले जनाएको छ।

होटल व्यवसायीदेखि विद्यार्थीसमेत प्रभावित

खानेपानीको नियमित आपूर्ति नहुँदा बजारमा बसोबास गर्ने नागरिकसँगै बाहिरबाट सेवा लिन आउने सेवाग्राहीसमेत प्रभावित भएका छन्।

पानीको अभावले होटल तथा चिया पसल सञ्चालन गर्ने व्यवसायी, विद्यार्थी, बालबालिका र वृद्धवृद्धालाई बढी समस्या भएको स्थानीयवासीले बताएका छन्।

तत्काल आपूर्ति सुचारु गर्न पहल

जिल्ला प्रशासन कार्यालय मुगुका प्रमुख जिल्ला अधिकारी पोषणराज भण्डारीले खानेपानीको समस्या तत्काल समाधान गरी आपूर्ति सुचारु गर्न सम्बन्धित पक्षसँग समन्वय भइरहेको बताए।

उनका अनुसार मर्मत कार्य सकेर सदरमुकाममा खानेपानी तत्काल सञ्चालन गर्ने पहल भइरहेको छ। स्थानीयवासीले तत्काल आपूर्ति सुचारु गर्न तथा भविष्यमा यस्ता समस्या दोहोरिन नदिन वितरण प्रणाली व्यवस्थित बनाउन र दीर्घकालीन योजना ल्याउन माग गरेका छन्।

Originally published on abcnews.com.np.