रोल्पा । अविरल वर्षापछि गएको पहिरोले घर तथा गोठ पुरिँदा रोल्पाको थबाङ गाउँपालिका–५ बोटलबारामा दुई जनाको मृत्यु भएको छ भने दुई जना घाइते भएका छन्।

जिल्ला प्रहरी कार्यालयका अनुसार मृत्यु हुनेमा थबाङ–५ बोटलबाराकी १८ वर्षीया शान्ति पुन मगर र ६० वर्षीय कमलबहादुर पुन मगर रहेका छन्।

पहिरोमा परी सोही स्थानका २२ वर्षीय हिमाल पुन मगर र २५ वर्षीय सञ्जय घर्ती मगर घाइते भएका छन्। उनीहरू दुवैको अवस्था गम्भीर रहेको प्रहरीले जनाएको छ।

अविरल वर्षापछि पहिरो

प्रहरीका अनुसार साउन २७ गते दिउँसोदेखि परेको अविरल वर्षाका कारण पहिरो खसेको थियो। पहिरोले घर तथा गोठ पुरिँदा मानवीय क्षति भएको हो।

घटनापछि उद्धारका लागि प्रहरी टोली राति नै घटनास्थल पुगेको थियो। प्रहरी र स्थानीयवासीको संयुक्त प्रयासमा घाइते दुवै जनाको उद्धार गरी उपचारका लागि स्वास्थ्य संस्थामा पठाइएको प्रहरीले जनाएको छ।

घाइतेहरूको अवस्था गम्भीर रहेकाले थप उपचार आवश्यक हुनसक्ने बताइएको छ।

छ घर तथा गोठमा क्षति

प्रहरीको प्रारम्भिक अनुमानअनुसार पहिरोका कारण बोटलबारामा छ वटा घर तथा गोठमा क्षति पुगेको छ।

घटनाको क्षतिको विस्तृत विवरण संकलन भइरहेको प्रहरीले जनाएको छ। लगातार वर्षा भइरहेकाले थप पहिरो तथा जोखिमको सम्भावनालाई ध्यानमा राख्दै स्थानीयवासीलाई सतर्क रहन आग्रह गरिएको छ।

प्रहरीले घटनाबारे थप विवरण संकलन तथा क्षतिको यकिन गर्ने काम भइरहेको जनाएको छ।

Originally published on abcnews.com.np.