मकवानपुर । बागमती प्रदेशका मुख्यमन्त्री इन्द्रबहादुर बानियाँले आगामी भदौ १ गते सोमबार प्रदेश सभाबाट विश्वासको मत लिनुहुने भएको छ। नेकपा एमालेले नेपाली कांग्रेस नेतृत्वको सरकारलाई दिएको समर्थन फिर्ता लिएपछि अल्पमतमा पर्नुभएका मुख्यमन्त्री बानियाँले विश्वासको मत लिन लाग्नुभएको हो।

मुख्यमन्त्रीको कार्यालयका अनुसार भदौ १ गते दिउँसो १ बजे प्रदेश सभामा विश्वासको मत लिने कार्यक्रम तय भएको छ। सोही प्रयोजनका लागि मुख्यमन्त्री बानियाँले शुक्रबार प्रदेश सभा सचिवालय, हेटौँडालाई आवश्यक व्यवस्था मिलाउन पत्राचार गर्नुभएको छ।

प्रदेश सभा सचिव रामकुमार पौडेलले मुख्यमन्त्री कार्यालयबाट विश्वासको मतसम्बन्धी पत्र प्राप्त भएको जानकारी दिनुभयो। पत्रका आधारमा भदौ १ गते दिउँसो १ बजे बस्ने प्रदेश सभा बैठकमा उपस्थित हुन प्रदेश सभा सदस्यहरूलाई सूचना जारी गरिएको उहाँले बताउनुभयो।

एमालेले समर्थन फिर्ता लिएपछि विश्वासको मत

सरकारमा सहभागी एमालेले साउन ६ गते सरकारलाई दिएको समर्थन फिर्ता लिएको थियो। कांग्रेस संसदीय दलका नेता बानियाँको नेतृत्वमा रहेको सरकार संविधानको धारा १६८ को उपधारा (२) बमोजिम गठन भएको हो।

संविधानको धारा १८८ को उपधारा (२) अनुसार मुख्यमन्त्री नेतृत्वको दल वा प्रदेश सरकारमा सहभागी दलले समर्थन फिर्ता लिएमा ३० दिनभित्र प्रदेश सभाबाट विश्वासको मत लिनुपर्ने व्यवस्था छ।

सोही संवैधानिक व्यवस्थाअनुसार मुख्यमन्त्री बानियाँले भदौ ३ गतेभित्र विश्वासको मत लिनुपर्ने भए पनि उहाँले त्यसअघि नै भदौ १ गते विश्वासको मत लिन लाग्नुभएको हो।

५३ मत आवश्यक, समीकरण पेचिलो

१०४ सदस्यीय बागमती प्रदेश सभामा सरकार बनाउन ५३ मत आवश्यक पर्छ। कुनै पनि दलको स्पष्ट बहुमत नभएकाले सरकार गठनका लागि दुई वा दुईभन्दा बढी दलको समर्थन आवश्यक छ।

प्रदेश सभामा कांग्रेसका ३६, नेकपाका २६, एमालेका २५, राष्ट्रिय प्रजातन्त्र पार्टीका १२, नेपाल मजदुर किसान पार्टीका ३ र हाम्रो नेपाली पार्टीका २ सदस्य छन्।

कांग्रेसलाई बहुमतका लागि थप १७ मत आवश्यक पर्नेमा हाम्रो नेपाली पार्टीको समर्थन प्राप्त भइसकेको छ। त्यसपछि कांग्रेसलाई बहुमत पुर्‍याउन थप १५ मत आवश्यक पर्ने देखिन्छ।

केन्द्रमा सत्ता साझेदारी गरिरहेका नेकपा र एमालेले राप्रपाको समर्थन खोजिरहेका छन्। तर राप्रपाले तत्काल सरकारमा सहभागी नहुने र सत्ताको खेलमा नलाग्ने निर्णय गरेपछि बागमती प्रदेशमा नयाँ सरकार गठनको समीकरण थप अन्योलपूर्ण बनेको छ।

अब मुख्यमन्त्री बानियाँले विश्वासको मत जुटाउन सक्नुहुन्छ वा सक्नुहुन्न भन्ने विषयले बागमती प्रदेशको आगामी सत्ता समीकरण निर्धारण गर्नेछ।

Originally published on abcnews.com.np.