काठमाडौं । नेपाली कांग्रेस संस्थापनइतर पक्षको राष्ट्रिय भेलामा पार्टीका शीर्ष नेतादेखि विभिन्न तहका नेता–कार्यकर्तासम्मको उल्लेख्य सहभागिता रहेको छ।

काठमाडौंको सुकेधारास्थित मिराकल पार्टी प्यालेसमा शुक्रबारदेखि सुरु भएको भेलामा पूर्वकार्यवाहक सभापति पूर्णबहादुर खड्का, नेताहरू विजयकुमार गच्छदार, डा. शेखर कोइराला, विमलेन्द्र निधि र प्रकाशमान सिंह सहभागी भएका छन्।

त्यस्तै, डा. शशांक कोइराला, डा. प्रकाशशरण महत, एनपी साउद, मोहनबहादुर बस्नेत, दीपक खड्कालगायत नेताहरू पनि भेलामा उपस्थित छन्। कांग्रेसका विभिन्न तहका नेता–कार्यकर्ताको समेत उल्लेख्य सहभागिता रहेको आयोजकले जनाएको छ।

पूर्वसभापति शेरबहादुर देउवा पनि भेलामा सहभागी हुने बताइए पनि समाचार तयार पार्दासम्म उनी कार्यक्रममा पुगेका छैनन्।

तीन दिनसम्म चल्ने

शुक्रबारदेखि सुरु भएको राष्ट्रिय भेला आइतबारसम्म सञ्चालन हुनेछ। भेलामा पार्टीको वर्तमान अवस्था, आगामी कार्ययोजना तथा राजनीतिक रणनीतिबारे छलफल हुने आयोजकले जनाएको छ।

भेलामार्फत संस्थापनइतर पक्षले पार्टीभित्रको एकता, संगठन सुदृढीकरण तथा आगामी राजनीतिक गतिविधिका विषयमा साझा धारणा बनाउने तयारी गरेको बताइएको छ।

Originally published on abcnews.com.np.