काठमाडौं । नेपाली कम्युनिस्ट पार्टी (नेकपा) का नेता तथा रोल्पाबाट प्रतिनिधिसभा सदस्य वर्षमान पुनले जिल्लामा बाढी–पहिरोबाट लगातार जनधनको क्षति भएपछि प्रधानमन्त्री वालेन्द्र शाह (बालेन) लाई भेटेर तत्काल उद्धार, राहत तथा पुनर्निर्माणमा सरकारको ध्यानाकर्षण गराएका छन्।

शुक्रबार सिंहदरबारमा प्रधानमन्त्री शाहसँग भेट गर्दै पुनले पछिल्ला दिनमा रोल्पाका विभिन्न क्षेत्रमा बाढी तथा पहिरोबाट भएको क्षतिको विवरण प्रस्तुत गरेका थिए। उनले विपद्मा परेकाको तत्काल उद्धार, घाइतेको उपचार, पीडितलाई राहत तथा विस्थापित परिवारको दीर्घकालीन पुनर्स्थापनाका लागि सरकारले विशेष प्राथमिकताका साथ काम गर्नुपर्नेमा जोड दिए।

रोल्पाको थबाङ गाउँपालिका–५ उवामा बुधबार गएको पहिरोमा परी १० जनाको मृत्यु भएको थियो। त्यसको भोलिपल्ट बिहीबार राति सुनछहरी गाउँपालिका–२ फलावाङमा गएको पहिरोमा थप तीन जनाको मृत्यु भएको छ। दुवै घटनामा केही व्यक्ति अझै बेपत्ता रहेको र केही घाइते भएको बताइएको छ।

लगातारको वर्षाका कारण जिल्लाका विभिन्न क्षेत्रमा घर तथा बस्तीमा क्षति पुग्नुका साथै सडक, खानेपानी, विद्यालयलगायत सार्वजनिक संरचनासमेत प्रभावित भएको पुनले प्रधानमन्त्रीलाई जानकारी गराएका थिए।

प्रधानमन्त्री शाहले थबाङको उवा घटनापछि राज्यका सबै संयन्त्र परिचालन गरिएको र पीडितलाई राहत उपलब्ध गराउन निर्देशन दिइसकेको जानकारी पुनलाई गराएका थिए। बेपत्ता व्यक्तिको खोजी तथा उद्धारलाई थप प्रभावकारी बनाउन आवश्यक निर्देशन दिने प्रतिबद्धतासमेत उनले जनाएका छन्।

त्यस्तै, बाढी–पहिरोका कारण अवरुद्ध सडक तथा अन्य सार्वजनिक सेवा तत्काल सञ्चालनमा ल्याउने र क्षतिग्रस्त संरचनाको पुनर्निर्माणलाई प्राथमिकतामा राख्ने प्रधानमन्त्रीले बताएका छन्।

प्रधानमन्त्री शाहले जाजरकोट–रुकुम भूकम्पपछि अपनाउन लागिएको पुनर्निर्माणको ‘नेपाली मोडल’ अनुसार रोल्पामा बाढी–पहिरोबाट क्षतिग्रस्त संरचनाको पुनर्निर्माण गर्ने प्रतिबद्धता जनाएको पुनले बताएका छन्।

भेटका क्रममा पुनले उवा तथा भित्रीगामका पहिरोमा अझै बेपत्ता रहेकाहरूको खोजी तथा उद्धारलाई तीव्रता दिन, घाइतेको निःशुल्क र प्रभावकारी उपचार गर्न माग गरेका थिए।

त्यस्तै, बाढी–पहिरोमा ज्यान गुमाएका परिवारलाई उचित क्षतिपूर्ति, घरबारविहीन भएकालाई तत्काल अस्थायी आवास र राहत तथा दीर्घकालीन पुनर्स्थापनाको व्यवस्था गर्न उनले आग्रह गरेका छन्।

अवरुद्ध सडक, खानेपानी, विद्यालयलगायत सार्वजनिक संरचना तत्काल सञ्चालनमा ल्याउनुका साथै क्षतिग्रस्त संरचनाको दीर्घकालीन पुनर्निर्माण अघि बढाउनुपर्ने उनको माग थियो।

रोल्पाको भौगोलिक विकटतालाई ध्यानमा राख्दै आगामी दिनमा हुन सक्ने विपद्का बेला तत्काल उद्धार गर्न विशेष उद्धार टोली तथा हेलिकोप्टर तयारी अवस्थामा राख्ने व्यवस्था मिलाउनसमेत पुनले प्रधानमन्त्रीसँग आग्रह गरेका छन्।

प्रधानमन्त्री शाहले पुनले राखेका मागप्रति सकारात्मक प्रतिक्रिया जनाउँदै सरकारका तर्फबाट सम्भव भएसम्म आवश्यक सबै कदम चाल्ने आश्वासन दिएका छन्। रोल्पामा विपद्बाट प्रभावित नागरिकको उद्धार, राहत तथा पुनर्स्थापनाका लागि सरकार गम्भीर रहेको उनले बताएका छन्।

Originally published on abcnews.com.np.