काठमाडौं। धनुषाको बनिनिया गाउँका धनवीर यादव अहिले ‘डीके सागर’ र ‘यादव सरकार’ नामले र्‍याप संगीतमा चिनिन थालेका छन् । आर्थिक अभावका कारण इँटाभट्टादेखि औषधि पसलसम्म काम गरेका यादवले भेटेरिनरी साइन्स अध्ययन गरे । त्यसपछि करिब पाँच वर्ष सशस्त्र प्रहरी बलमा बिताए । अहिले भने उनले बर्दी छाडेर संगीतलाई आफ्नो करिअर बनाउने बाटो रोजेका छन् ।

परिवारको आर्थिक अवस्था सुधार्ने उद्देश्यले अध्ययनसँगै विभिन्न काम गरेका यादवको संगीतप्रतिको रुचि भने सानैदेखिको हो । विशेषगरी र्‍यापलाई आफ्ना भावना, भोगाइ र सामाजिक विषय व्यक्त गर्ने माध्यम बनाएका उनले सशस्त्र प्रहरीमा कार्यरत रहँदासमेत गीत लेख्न छाडेनन् ।

खोटाङको पहाडी क्षेत्रदेखि तराईका सीमा नाकासम्म जिम्मेवारी निर्वाह गरेका यादवले जागिरकै क्रममा ‘जनचेतना’ गीत सार्वजनिक गरे । गीतले चर्चा पाएपछि उनको सांगीतिक परिचय थप बलियो बन्यो । गीत सार्वजनिक भएको केही दिनमै मोटरसाइकल दुर्घटनामा परेर अस्पताल भर्ना भएका उनले गीतले मिलियन भ्युज पार गर्दासमेत त्यसको खुसी खुलेर मनाउन नपाएको सम्झन्छन् ।

जागिरभन्दा संगीत रोजे

संगठनको अनुशासन र आफूले खोजेको सांगीतिक स्वतन्त्रताबीच तालमेल नमिलेपछि यादवले करिब एक महिनाअघि सशस्त्र प्रहरीको जागिर छाडेका हुन् ।

उनका अनुसार संगठनभित्र तल्लो तहका कर्मचारीमाथि हुने व्यवहार, राजनीतिक हस्तक्षेप तथा सांगीतिक गतिविधिप्रतिको असहजताले जागिर छाड्ने निर्णयमा प्रभाव पारेको हो ।

र्‍याप लेखिरहेका बेला वरिष्ठ अधिकारीहरूले संगीत छाडेर जिम्मेवारीमा ध्यान दिन दबाब दिने गरेको उनको भनाइ छ । आफूलाई स्वतन्त्रता र सम्मान आवश्यक रहेको बताउँदै यादवले बर्दी छाडेपछि पिँजडाबाट मुक्त भएको चराको जस्तो अनुभूति भएको बताएका छन् ।

‘मधेसी भएकै कारण विभेद भयो’

यादवले आफूले मधेसी भएकै कारण कलेज जीवनदेखि नै विभेद र अपमान भोग्नुपरेको अनुभव सुनाएका छन् । सिन्धुलीमा कलेज पढ्दा आफूलाई ‘मधिसे’ भनेर हेप्ने र कुटपिट गर्न खोज्ने घटना भएको उनको भनाइ छ ।

सशस्त्र प्रहरीमा प्रवेश गरेपछि पनि विभेदको अनुभूति अन्त्य नभएको उनी बताउँछन् । भेटेरिनरी साइन्स अध्ययन गरेको योग्यता हुँदाहुँदै सम्बन्धित शाखाको तालिममा अवसर नपाएको र आफ्ना पहाडी साथीहरूले सहज रूपमा अवसर पाएको उनको गुनासो छ ।

उनका अनुसार बर्दी सबैका लागि एउटै भए पनि अवसरमा समानता नभएको अनुभूति भयो । अहिले भने उनी आफ्ना भोगाइ, सामाजिक विभेद र संघर्षलाई र्‍यापमार्फत अभिव्यक्त गर्दै संगीतकै यात्रालाई अगाडि बढाउने तयारीमा छन् ।

Originally published on abcnews.com.np.