काठमाडौँ । नागढुङ्गा–सिस्नेखोला सुरुङमार्ग सर्वसाधारणका लागि चाँडै सञ्चालनमा आउने भएको छ। साउनको दोस्रो साता उद्घाटन गरिएको सुरुङमार्ग हाल एम्बुलेन्सलगायत आकस्मिक तथा आपत्कालीन सवारीसाधनका लागि मात्र खुला गरिएको छ।

नागढुङ्गा–सिस्नेखोला सुरुङमार्ग आयोजनाका उपनिर्देशक इन्जिनियर सञ्जय पन्थीका अनुसार अहिले दैनिक १५० देखि २०० वटा आकस्मिक तथा आपत्कालीन सवारीसाधन सुरुङमार्ग हुँदै आवतजावत गरिरहेका छन्। त्यस्ता सवारीसाधनलाई निःशुल्क आवतजावतको व्यवस्था गरिएको छ।

सुरुङमार्ग सर्वसाधारणका लागि खुला गर्नुअघि अन्तिम चरणका सुरक्षा परीक्षण तथा आपत्कालीन अभ्यास भइरहेका छन्। पन्थीका अनुसार सुरुङभित्र आपत्कालीन उद्धार अभ्यास (मक ड्रिल) समेत सम्पन्न भइसकेको छ। अभ्यासमा काठमाडौँ महानगरपालिका, चन्द्रागिरि नगरपालिका, वारुणयन्त्र, सशस्त्र प्रहरी अस्पताल तथा सशस्त्र प्रहरी बलको डिजास्टर समूह सहभागी भएका थिए।

सुरुङभित्र आगलागी भएमा त्यसलाई नियन्त्रण गर्ने, यात्रुले भरिएको बसमा आगलागी हुँदा तत्काल उद्धार गर्ने तथा यात्रुको सुरक्षित व्यवस्थापन गर्ने विषयमा समेत अभ्यास गरिएको छ। ठूला सवारीसाधन दुर्घटना भएमा उद्धार गर्ने विषयमा थप अध्ययन र अभ्यास भइरहेको आयोजनाले जनाएको छ।

सञ्चालन योजना स्वीकृत भएपछि व्यावसायिक सञ्चालन

सुरुङमार्ग सञ्चालनको जिम्मेवारी पाएका कम्पनीहरूले अब ‘सुरुङमार्ग सञ्चालन योजना’ पेस गर्नेछन्। उक्त योजनाको आयोजनाले अध्ययन तथा मूल्याङ्कन गरेपछि स्वीकृति दिइनेछ। त्यसपछि सुरुङमार्ग चरणबद्ध रूपमा सर्वसाधारणका लागि व्यावसायिक सञ्चालनमा ल्याइनेछ।

सुरुआती चरणमा साना सवारीसाधनलाई मात्र सीमित गतिमा सुरुङमार्ग हुँदै आवतजावत गर्न अनुमति दिने तयारी गरिएको छ। सुरुङभित्र ठूला सवारीसाधन दुर्घटना भएमा उद्धार गर्ने पर्याप्त अभ्यास नभएकाले पहिलो चरणमा साना सवारीसाधनलाई प्राथमिकता दिइने उपनिर्देशक पन्थीले बताउनुभयो। आगामी सोमबारदेखि साना सवारीसाधनलाई सुरुङमार्ग प्रयोग गर्न अनुमति दिने तयारी भइरहेको छ।

उद्घाटन र आयोजनाको महत्व

पूर्वाधार विकासमन्त्री सुनील लम्साल, नेपालका लागि जापानका राजदूत मायदा तोरू तथा जापान अन्तर्राष्ट्रिय सहयोग नियोग (जाइका) का अध्यक्ष डा. तानाका अकिहिकोको उपस्थितिमा साउनको दोस्रो साता विशेष समारोहबीच सुरुङमार्गको उद्घाटन गरिएको थियो।

सुरुङमार्ग पूर्ण रूपमा सञ्चालनमा आएपछि काठमाडौँ उपत्यकाको यातायात व्यवस्थापनमा महत्वपूर्ण सुधार आउने अपेक्षा गरिएको छ। यसबाट यात्राको समय तथा दूरी घट्नुका साथै इन्धन खपत र ढुवानी लागतसमेत कम हुने विश्वास गरिएको छ। साथै, व्यापारिक गतिविधि विस्तार तथा सडक पूर्वाधारको आधुनिकीकरणमा समेत दीर्घकालीन योगदान पुग्ने अपेक्षा गरिएको छ।

आयोजनाअन्तर्गत मुख्य सुरुङ २.६८ किलोमिटर अर्थात् २ हजार ६८८ मिटर लामो छ। त्यस्तै, आपत्कालीन उद्धारका लागि २.५५ किलोमिटर लामो छुट्टै सुरुङ निर्माण गरिएको छ।

६० देखि ६०० रुपैयाँसम्म सडक उपभोग दस्तुर

नागढुङ्गा–सिस्नेखोला सुरुङमार्ग प्रयोग गर्ने सवारीसाधनबाट ६० देखि ६०० रुपैयाँसम्म सडक उपभोग दस्तुर (टोल शुल्क) लिने निर्णय यसअघि नै मन्त्रिपरिषद्ले गरिसकेको छ।

नेपाल सरकारले राजपत्रमा सूचना प्रकाशित गरी सवारीसाधनको प्रकारअनुसार उक्त शुल्क निर्धारण गरेको हो। सुरुङमार्ग प्रयोग गर्दा काठमाडौँ प्रवेश गर्ने र काठमाडौँबाट बाहिरिने सवारीसाधनका लागि फरक–फरक शुल्क तोकिएको छ।

Originally published on abcnews.com.np.