काठमाडौं । नेपाली कांग्रेसका नेता एनपी साउदले सभापति गगन थापामाथि पार्टी विभाजन चाहेको आरोप लगाएका छन्। इतर पक्षको भेलालाई सम्बोधन गर्दै साउदले पार्टी एकताका लागि थापा पक्षबाट सार्थक पहल नभएको दाबी गरेका हुन्।

उनले व्यक्तिगत भेटघाट भए पनि पार्टीको विवाद समाधानका लागि गम्भीर र सार्थक छलफलमा थापा पक्ष नआएको बताए।

अदालतको निर्णयपछि मात्रै एकताको आधार

साउदले कांग्रेसको वर्तमान विवादको समाधान सर्वोच्च अदालतको निर्णयपछि मात्र सम्भव हुने बताए। उनका अनुसार अदालतले पुनरावलोकनका लागि निस्सा दिइसकेकाले त्यसअघि पार्टी एकता कठिन छ।

उनले भने, ‘अदालत गएपछि निस्सा दिएको छ। पुनरावलोकनअघि एकता हुन गाह्रो छ।’

देउवा नेतृत्वको कार्यसमिति कायम रहने वा विशेष महाधिवेशनबाट बनेको कार्यसमितिले वैधता पाउने भन्ने विषय अदालतबाटै टुंगो लाग्ने उनको भनाइ छ। अदालतको निर्णयपछि मात्रै पार्टीभित्र राजनीतिक तथा सांगठनिक एकताको आधार तयार हुने उनले बताए।

१४औँ महाधिवेशन समिति पुनर्स्थापनाको माग

साउदले नेपाली कांग्रेसको १४औँ महाधिवेशनबाट निर्वाचित कार्यसमितिलाई पुनर्स्थापित नगरेसम्म पार्टी एकता सम्भव नहुने बताएका छन्।

अदालतबाट अन्तिम निर्णय नआएसम्म देउवा नेतृत्वको वर्तमान कार्यसमितिले नै पार्टी सञ्चालन गरिरहने उनको दाबी छ।

उनले पार्टीको विवादलाई तत्काल समाधान गर्नुभन्दा कानुनी प्रक्रियाको टुंगो पर्खनुपर्ने अवस्था रहेको बताउँदै त्यसपछि मात्रै कांग्रेसभित्र एकताको स्पष्ट बाटो खुल्ने धारणा राखे।

Originally published on abcnews.com.np.