काठमाडौं । खाना पकाउने एलपी ग्यास खरिद गर्न सर्वसाधारण नागरिकता तथा परिचयपत्र बोकेर घण्टौँसम्म लाइनमा बस्न बाध्य भएका छन्। सरकारले ग्यास खरिद गर्दा नेपाली नागरिकताको प्रमाणपत्र वा अन्य परिचयपत्र अनिवार्य रूपमा ल्याउन सूचना जारी गरेपछि शनिबार बिहानैदेखि काठमाडौंका विभिन्न वितरण केन्द्रमा उपभोक्ताको लामो लाइन लागेको हो।

नेपाल आयल निगमले ग्यासको आपूर्ति सहज बनाउन जिल्ला प्रशासन कार्यालय काठमाडौंसँगको समन्वयमा शनिबारदेखि राजधानीका पाँच स्थानबाट विभिन्न ब्रान्डका एलपी ग्यास वितरण सुरु गरेको छ। तर वितरण केन्द्रबाट ग्यास बिक्री सुरु भए पनि उपभोक्ताले सहज रूपमा ग्यास पाउन नसकेको गुनासो गरेका छन्।

निगमका अनुसार टेकुस्थित नेपाल आयल निगम परिसर, चाबहिलस्थित यातायात कार्यालय परिसर, कीर्तिपुर र वसुन्धरास्थित राधास्वामी परिसर तथा बबरमहलस्थित पुरानो जिल्ला प्रशासन कार्यालय परिसरबाट ग्यास बिक्री भइरहेको छ। बिक्री केन्द्रअनुसार फरक–फरक ब्रान्डका ग्यास सिलिन्डर उपलब्ध गराइएको निगमले जनाएको छ।

ग्यास लिन बिहानैदेखि वितरण केन्द्रमा पुगेका उपभोक्ताको भीड व्यवस्थापन गर्नसमेत कठिन भएको छ। निगमका कर्मचारी भीमप्रसाद पौडेलका अनुसार बबरमहलस्थित वितरण केन्द्रमा मात्रै ग्यास लिन एक हजारभन्दा बढी उपभोक्ता पुगेका छन्। बिहानैदेखि ठूलो संख्यामा उपभोक्ता लाइनमा रहेको उनले बताए।

निगमले शनिबार बिहान १० बजेदेखि साँझ ६ बजेसम्म ग्यास बिक्री गर्ने व्यवस्था गरेको छ। बबरमहल केन्द्रबाट काठमाडौंका जुनसुकै क्षेत्रका उपभोक्ताले ग्यास लिन सक्ने व्यवस्था गरिएको छ। उक्त केन्द्रमा विभिन्न १० प्रकारका ग्यास सिलिन्डर उपलब्ध रहेको पौडेलले जानकारी दिए।

तर, वितरण केन्द्रमा लामो समय लाइन बसेका कतिपय उपभोक्ताले आफ्नो पालो आउँदा समेत ग्यास नपाएको गुनासो गरेका छन्। बबरमहलमा लाइनमा बसेका उपभोक्ताका अनुसार घण्टौँसम्म पालो कुरेपछि वितरणस्थलमै ग्यास अभाव हुँदा थप समय पर्खनुपर्ने अवस्था आएको छ।

निगमले ग्यासको संकटलाई ध्यानमा राख्दै ग्यास डिपोसँग समन्वय गरी बिक्री तथा वितरणमा सहजीकरण गरिरहेको जनाएको छ। साथै, ग्यासको कालोबजारी तथा अनावश्यक भण्डारण रोक्न बजार अनुगमनसमेत तीव्र पारिएको छ।

निगमका अनुसार ग्यास लुकाउने, आवश्यकता भन्दा बढी भण्डारण गर्ने तथा कालोबजारी गर्ने व्यक्तिलाई कानुनी दायरामा ल्याउने गरी अनुगमन भइरहेको छ।

ग्यास वितरणका लागि पाँच स्थान तोकिए पनि उपभोक्ताको भीड र अभावको गुनासोले आपूर्ति तथा वितरण प्रणाली अझै सहज बन्न नसकेको देखिएको छ। वितरण केन्द्रमा पर्याप्त ग्यासको उपलब्धता सुनिश्चित नगरी केवल बिक्री केन्द्र थप्दा मात्र समस्या समाधान नहुने उपभोक्ताको भनाइ छ।

निगमले अत्यावश्यक परेका उपभोक्तालाई मात्र तोकिएको वितरण केन्द्र र समयमा उपस्थित भएर ग्यास खरिद गर्न आग्रह गरेको छ। ग्यास किन्न आउने उपभोक्ताले अनिवार्य रूपमा नागरिकता वा अन्य परिचयपत्र साथमा ल्याउनुपर्ने व्यवस्था गरिएको छ।

Originally published on abcnews.com.np.