शनिबार दिउँसो करिब १ बजे पोखरा–२६ को विजयबस्तीबाट विजयपुर खोला तरेर सक्नेरीतर्फ जाने क्रममा करिब १४–१५ वर्ष उमेरका दुई बालकलाई खोलाले बगाएको थियो। तीमध्ये एक बालक सम्पर्कमा आए पनि अर्का बालक अझै बेपत्ता छन्।

बेपत्ता बालक पोखरा–१४ का ओमन राई रहेको खुलेको छ। सम्पर्कमा आएका बालक भने पोखरा–१४ छिनेडाँडाका निकसन गुरुङ हुन्।

खोजी तथा उद्धारमा प्रहरी र सशस्त्र प्रहरी परिचालन

घटनाको जानकारी पाएलगत्तै इलाका प्रहरी कार्यालय शिशुवा, जिल्ला प्रहरी कार्यालय कास्की, वडा प्रहरी कार्यालय रामबजार र सशस्त्र प्रहरीको टोली घटनास्थलमा पुगेको छ।

इलाका प्रहरी कार्यालय शिशुवाबाट प्रहरी नायब उपरीक्षक गुणराज बुढाथोकीको कमान्डमा सात जना, जिल्ला प्रहरी कार्यालय कास्कीबाट प्रहरी निरीक्षक रामजी देवकोटाको कमान्डमा सात जना र वडा प्रहरी कार्यालय रामबजारबाट प्रहरी निरीक्षक तेजप्रसाद कँडेलको कमान्डमा सात जना प्रहरी परिचालन गरिएको छ।

यस्तै, सशस्त्र प्रहरी बेस क्याम्प कुडहरबाट सशस्त्र प्रहरी निरीक्षक केशव शर्माको कमान्डमा नौ जनाको गोताखोर टोली समेत खोजी तथा उद्धारमा खटिएको छ।

टोलीले विजयपुर खोलामा बेपत्ता बालकको खोजी गर्नुका साथै घटनाबारे थप विवरण संकलन गरिरहेको प्रहरीले जनाएको छ। घटनास्थल इलाका प्रहरी कार्यालय शिशुवाबाट करिब ६ किलोमिटर पश्चिम–दक्षिणतर्फ पर्छ।

बेपत्ता ओमन राईको खोजी कार्य जारी रहेको प्रहरीले जनाएको छ।