रूपन्देही । दाङको घोराही उपमहानगरपालिका–१८ ढोरेनीका ५ वर्षीय सुमन परियारलाई प्रहरीले खोलामा बग्दै गरेको अवस्थामा सकुशल उद्धार गरेको छ।

खारखोलीबाट बालक बगेको सूचना प्राप्त भएपछि वडा प्रहरी कार्यालय घोराहीबाट प्रहरी निरीक्षक नवराजबहादुर शाहीको नेतृत्वमा सातजनाको टोली परिचालन गरिएको थियो। टोलीले गोदारी भन्ने स्थानमा खोलामा बग्दै गरेका बालकलाई सकुशल उद्धार गरेको लुम्बिनी प्रदेश प्रहरी कार्यालय तुलसीपुरले जनाएको छ।

उद्धारपछि बालकलाई तत्काल उपचारका लागि राप्ती स्वास्थ्य विज्ञान प्रतिष्ठान, घोराही लगिएको थियो। अस्पतालका अनुसार बालकको स्वास्थ्य अवस्था सामान्य रहेको छ। उपचारपछि उनलाई घर फर्काइने जनाइएको छ।

प्रहरीको सक्रियतामा उद्धार

प्रहरी निरीक्षक शाहीको नेतृत्वमा खटिएको टोलीले घटनास्थलमा पुगेर खोलामा फसेका बालकको खोजी थालेको थियो। केही समयको प्रयासपछि टोलीले बालकलाई सकुशल उद्धार गर्न सफल भएको हो।

बालकको समयमै उद्धार भएपछि स्थानीयवासीले प्रहरीको तत्परता र सक्रियताको प्रशंसा गरेका छन्।

Originally published on abcnews.com.np.