बागलुङ । सत्यसाई केन्द्र बागलुङको आयोजनामा गण्डकी प्रदेशस्तरीय दुईदिने सिर्जनात्मक बाल कार्यक्रम शनिबारदेखि बागलुङमा सुरु भएको छ।

बागलुङ नगरपालिकाका उपप्रमुख राजु खड्काले कार्यक्रमको उद्घाटन गर्नुभयो। कार्यक्रममा गण्डकी प्रदेशका विभिन्न सत्यसाई केन्द्रसँग आबद्ध बालबालिका, अभिभावक तथा शिक्षक गरी करिब १ सय ९० जनाको सहभागिता रहेको आयोजकले जनाएको छ। तीमध्ये करिब १ सय जना बालबालिका सहभागी छन्।

कार्यक्रमअन्तर्गत वक्तृत्वकला, हाजिरीजवाफ, कविता, निबन्ध तथा कथा लेखन, गीत–संगीत र भजनलगायतका सिर्जनात्मक तथा प्रतियोगितात्मक गतिविधि सञ्चालन हुनेछन्। कार्यक्रम बागलुङका राधाकृष्ण मन्दिरलगायत विभिन्न स्थानमा आयोजना गरिने जनाइएको छ।

सत्यसाई केन्द्र गण्डकीका अध्यक्ष टंकनाथ रेग्मीका अनुसार कार्यक्रमको मुख्य उद्देश्य बालबालिकाको सिर्जनात्मक क्षमता विकास गर्नु हो। कार्यक्रममा बागलुङसहित पोखरा, स्याङ्जा तथा गण्डकी प्रदेशका अन्य जिल्लाबाट समेत बालबालिका, अभिभावक र शिक्षक सहभागी भएका छन्।

गण्डकी प्रदेशमा मनाङ र मुस्ताङबाहेक नौ जिल्लामा सत्यसाई केन्द्र स्थापना भई सञ्चालनमा रहेका छन्। ती केन्द्रले धार्मिक तथा आध्यात्मिक विकास, अनुशासन, मानवसेवा र सकारात्मक सोच प्रवर्द्धनका क्षेत्रमा विभिन्न गतिविधि सञ्चालन गर्दै आएका छन्।

सत्यसाई केन्द्र बागलुङका संस्थापक कृष्णबहादुर श्रेष्ठले यस्ता कार्यक्रमले बालबालिकामा उत्साह र आत्मविश्वास बढाउनुका साथै अभिभावकमा समेत सकारात्मक सोचको विकास गर्न सहयोग पुग्ने बताउनुभयो।

वार्षिक सम्मेलन

सत्यसाई केन्द्र गण्डकी प्रदेश समितिले हरेक वर्ष बालबालिकाको सम्मेलन तथा सिर्जनात्मक प्रतियोगिता आयोजना गर्दै आएको छ। यस वर्षको कार्यक्रममार्फत बालबालिकामा रहेको प्रतिभा पहिचान तथा प्रस्फुटन गर्ने उद्देश्य राखिएको आयोजकले जनाएको छ।

Originally published on abcnews.com.np.